David Pietrzkeviç : ...“Bakı” qol vura bilməyəcək - MÜSAHİBƏ

Topaz Premyer Liqasının XVIII turu çərçivəsində bu gün “Bakı”nı qəbul edəcək “Qəbələ” klubunun qapıçısı David Pietrzkeviç apasport.az saytının əməkdaşının suallarını cavablandırıb.

- “Bakı” ilə oyuna necə hazırlaşırsınız?
- Hazırlığımız həmişəki qaydada davam edir. Qələbə qazanmaq əzmindəyik.

- Qəbələdə qar yağıb. Belə şərait komandanın hazırlığına maneə yaratmır?
- Oyunadək meydan ideal vəziyyətdə olacaq. Qar olsa belə, şərtlər hər iki komanda üçün eyni olacaq. Yəni, maneə tək bizə yox, rəqibə də yarana bilər.

- Bu cür vəziyyətlərdə qapıçılar daha çox əziyyət çəkir, səhvlərlə üzləşirlər.
- Sonuncu məşqimiz zamanı meydançanın bir hissəsi qar idi. Buna baxmayaraq, heç bir maneə hiss etmədim. Oyun başlayanadək isə oranı tamamilə təmizləyəcəklər.

- Qeyri-sabit nəticələri ilə yadda qalan “Bakı” son turda “Qarabağ”ı yenib, zirvədən saldı. Həmin matçı izləmisinizmi? Bu matçda komandanın tapşırığı nə olacaq?
- əlbəttə, baxmışam. Necə yaxşı oynadıqlarını və qələbə qazandıqlarını bilirəm. İkinci dövrənin son matçı olduğuna görə, hər iki komanda qalib gəlmək istəyir. Bu həm bizim üçün, həm də onlar üçün çətin olacaq.

- Rəqib hazırda Topaz Premyer Liqasında ən çox qol vuran iki komandadan biridir. Qapıçı kimi, bu amil sizi narahat etmir?
- “Bakı”nı tanıyıram. Yaxşı oynayır. Çox qol vurublar. Yaxşı hazırlaşsaq və müdafiədə səhvsiz oynasaq, onlar qol vura bilməyəcək.

- Son turda liderliyə yüksəlməyi əldən verdiniz. Bəs “Neftçi”yə həmin məğlubiyyət komandaya necə təsir edib?
- Futbolda belə hallar olur. Əvvəlcədən heç nəyi bilmək olmur. Əvvəlki iki oyunda qələbə qazandıq, amma Bakıda uduzduq. Bunu unutmuşuq. Arxaya deyil, irəliyə baxmaq lazımdır. Bütün konsentrasiyamızı “Bakı” ilə qarşılaşmaya yönəltmişik.

- İlin bu vaxtında keçirilən oyunlar xüsusilə legioner futbolçuların fikirlərinin ölkələrinə yollanmağa yönəlməsi baxımından çətin keçir. Hətta buna görə sürpriz nəticələr də qeydə alınır...
- Ev haqda düşünən yoxdur. Hamı fikrini oyuna yönəldib. Vacib olan odur ki, qələbə qazanıb, evə sevinclə yollanaq.

- Son 5 oyunda qapı sizə həvalə edilsə də, əvvəlki oyunlarda üstünlük Dieqo Kostaya verilirdi. Bu nədən irəli gəlirdi: ümidləri doğrultmurdunuz?
- Bu suala baş məşqçi cavab versə yaxşıdır.