Berti Foqts: “Mən söz verməmişəm” – MÜSAHİBƏ

Futbol üzrə Azərbaycan milli komandasının baş məşqçisi Berti Foqtsun apasport.az saytının Antalyaya ezam olunmuş əməkdaşına müsahibəsi

- Klublarımızın hazırlıq prosesini izləmək üçün Antalyaya gəlmisiniz. İlk təəssüratlarınızı bilmək maraqlı olardı...

- Dünən “Qarabağ”ın, bu gün isə “Xəzər Lənkəran”ın məşqini izlədim (müsahibə dünən götürülüb – red). Çox xoşuma gəldi, yaxşı işləyirlər. “İnter”in Hollandiya klubu ilə yoxlama matçına da baxdıq. Komandadakı atmosfer, məşqçi ilə futbolçular arasındakı münasibət çox yaxşıdır.

- Növbəti günlər üçün planınız necədir?

- Yanvarın 19-da Bakıya qayıdacağam. Burada olduğumuz müddətdə Azərbaycan klublarının məşq və oyunlarını izləyəcəyik.

- Qısa bir zamanda “Neftçi” və “Rəvan” klublarında baş verən baş məşqçi dəyişiklikləri barədə nə deyə bilərsiniz?

- Bu, klubların işidir.

- Belə bir statistika var ki, sizin millidə köməkçiləriniz olan məşqçilər “Neftçi”də uğur qazana bilmirlər. Hans-Yurgen Gede, Vaqif Sadıqov, indi də Nazim Süleymanov...

- Bu, klub rəhbərlərinin qərarıdır.

- Nazim Süleymanovun yenidən milliyə dönmək ehtimalı varmı?

- Xeyr. “Neftçi”yə getmək Nazim Süleymanovun öz qərarı idi. Digər tərəfdən, artıq mənim köməkçilərim var. Volfqanq Rollfla Mahmud Qurbanov yenidir. Həmçinin, Aslan Kərimov və qapıçılar üzrə məşqçi Rauf Mehdiyevlə bərabər çalışacağam. Onlara beynəlxalq təcrübə qazanmaq imkanı verməliyəm. Mən heç vaxt “Neftçi”nin prezidenti ilə danışmamışam ki, məsələn, Gede həmin klubda baş məşqçi olsun.

- Milli komandanın Dubay toplanışının vaxtı dəqiqləşib?

- Bu FİFA-nın “pəncərəsi”nə uyğun, martın 2-dən 5-dək olacaq.

- Yoldaşlıq oyunları üçün rəqib müəyyənləşib?

- Xeyr, bununla bağlı AFFA-dan məlumat gözləyirəm.

- Gələn ay 2016-cı il Avropa çempionatının seçmə qrup mərhələsinin püşkü atılacaq. Hansı komandaların millimizə rəqib olmasını istərdiniz?

- Nə deyim, bu, məndən asılı məsələ deyil.

- Yığmamıza növbəti Avropa çempionatının final mərhələsinə vəsiqə qazandıracağınızı açıqlamışdınız. Sözünüzün üstündə durursunuz?

- Mən heç vaxt elə söz deməmişəm. Ola bilsin ki, jurnalistlər özlərindən nəsə yazıblar. Püşkdən çox şey asılıdır.

- Ötən ilin sonunda AFFA ilə bağladığınız müqavilənin şərtlərində bəzi dəyişikliklər edilib. Bilmək olarmı ki, məhz sizin istəyinizlə edilən dəyişiklik hansıdır?

- Hansı dəyişiklik, nəyi nəzərdə tutursunuz?

- Məsələn, əvvəllər klubların Antalyada keçirdiyi toplanışları izləmirdiniz. Üstəlik, əvvəl Azərbaycanda 7-8 gün, indi isə daha çox, 20-21 gün qalacağınız deyilir...

- Bunu sizə kim deyib?

- İclasdan sonra AFFA rəhbərliyi və İcraiyyə Komitəsinin üzvləri mətbuata açıqlama veriblər...

- Mən həmin fikirlərlə tanış deyiləm.