Bakıda olimpiadaya ən azı 7 növ üzrə lisenziya veriləcək

2015-ci ildə Bakıda keçiriləcək I Avropa Oyunlarında ən azı 7 növ üzrə yarışlar 2016-cı il Rio-de-Janeyro Yay Olimpiya Oyunlarına lisenziya xarakteri daşıyacaq. Bu barədə Lent.az-a “Bakı-2015” Təşkilat Komitəsindən məlumat verilib.

Rəsmi açıqlamada bildirilir ki, həmin növlər velosiped idmanı, güllə atıcılığı, üzgüçülük, stolüstü tennis, taekvondo, triatlon və çimərlik voleyboludur. Digər növlərin də bu siyahıya daxil edilməsi mümkündür. Ümumilikdə isə Oyunlarda 18 növ üzrə 5400-dən artıq idmançı mübarizə aparacaq.

Artıq Avropa Oyunlarının startına 500 gün qaldığı açıqlanıb. Təşkilatçılar bildiriblər ki, hazırlıq işləri qitənin bütün xalqlarını birləşdirəcək əzəmətli idman festivalı keçirməyə hədəflənib. Avropa Olimpiya Komitəsi (EOC) olimpiya dövlətləri və avropalı idmançılar üçün böyük, ümümqitə, çoxnövlü idman tədbirinin keçirilməsini nəzərdə tutan, uzun müddətdir gözlənilən cəhdini həyata keçirəcək. Bu həftədən başlayaraq, təşkilatçılar Avropa Oyunlarında iştirak edəcək EOC-a üzv 49 ölkəyə idman növlərinin təsnifatı haqqında məlumatı göndərməyə başlayacaqlar. Qurumun prezidenti və Beynəlxalq Olimpiya Komitəsinin (İOC) yüksək rütbəli üzvü Patrik Hikki bildirib ki, Bakı gələn il keçiriləcək Avropa Oyunları çərçivəsində yüksək səviyyəli idman yarışının təşkili üçün çox əlverişli vəziyyətə malikdir: “Avropa Oyunlarına hazırlıq mərhələsinin yekun 500 gününə daxil olan Bakıya uğurlar arzulayıram. Əminəm ki, Bakı bütün Avropanın qürur duyacağı yüksək keyfiyyətli idman tədbiri təşkil edəcək. Biz bu mühüm hədəfə nail olmaq və əzəmətli idman tədbirinin hazırlıq işlərində, Avropa idmançıları və dövlətləri üçün təcrübədə davamlı irəliləyişi əldə etmək məqsədilə “Bakı-2015”ə cəlb edilən hər kəsi təbrik edirik”.

Gənclər və idman naziri, “Bakı-2015” Əməliyyat Komitəsinin baş icraçı direktoru Azad Rəhimov bildirib ki, hər ötən gün Bakıda keçiriləcək ilk Avropa Oyunlarının daha diqqətlə təşkili məsuliyyətini və şərəfini artırır. Onun sözlərinə görə, Oyunlar üçün yeni infrastruktur və iş yolları uzunmüddətli mirası təmin etməklə ev sahibliyi edəcək şəhərin və ölkənin görünüşünü tamamilə dəyişəcək: “Oyunlar üçün böyük həcmli tikinti layihələri bizim şəhərlərimiz, cəmiyyətimiz və gənclərimiz üçün onlardan onilliklər boyu faydalanmağa imkan verəcək. Yeni hava limanı və nəqliyyat sektorunda metropoliten, avtobus sahəsində 13 mühüm təkmilləşdirmə layihəsi, habelə yeni beynəlxalq standartlarına uyğun idman arenaların açılması daha çox gənci idmanla məşğul olmağa həvəsləndirəcək və Avropada yeni idman məkanının meydana çıxmasını təmin edəcək”.

Nazir qeyd edib ki, müxtəlif sahələrdən olan yerli layihəçilərin, xidmət təchizatçıların və şirkətlərin Oyunlara hazırlıq işlərinə cəlb edilməsi biznes və texnologiya daxil olmaqla, mədəniyyət və kreativ sənayelərədək çoxlu sektorlarda yerli bilik və təcrübə inkişafı üçün dəyərli irs qoyacaq: “Bu, gələcəkdə Bakını və Azərbaycanı Avropada idman, biznes, turizm və mədəniyyət istiqamətlərində yeni və dinamik məkana çevrilməsinə yardımçı olacaq”.

Yerli Azərbaycan vətəndaşları və icmaların həyatda bir dəfə keçiriləcək tədbirdə iştiraklarının təmin edilməsi ətraflı planlaşdırılıb. Tədbir üçün biletlərin satışı, könüllülük, mədəniyyət və Oyunlar üçün başqa aparıcı proqramların təşkili üzrə işlər getməkdədir.

Təşkilatçılar bildiriblər ki, Oyunlar üçün yerlərin inşası əsas hədəfdir. O cümlədən, İdmançılar Kəndi artıq elit idmançılar üçün ən yaxşı yerləşmə və hazırlıq yerlərindən biri kimi nəzərdən keçirilir. Bəzi sahələr artıq bu il sınaq tədbirləri üçün hazır olacaq. “Bakı-2015” Əməliyyat Komitəsinin baş əməliyyat rəhbəri Cim Şerr deyib: “Müsbət irəliləyiş əldə edilib və inkişaf davam etməkdədir, bizim heyətlər arasında əsassız özünə güvənmə hallarına yol verilməyəcək. Növbəti 500 gün ərzində EOC, Azərbaycan xalqı və Avropa idmançıları qarşısında öhdəliklərimizin yerinə yetirilməsi üçün hələ ediləcək çox iş var, lakin biz bu günədək əldə etdiyimiz irəliləyişdən məmnunuq”.