Azərbaycan millisi sensasiya etdi

Azərbaycanın voleybolçu qadınlardan ibarət milli komandası tarixində 3-cü dəfə dünya çempionatına vəsiqə qazanıb. Lent.az-ın məlumatına görə, yığmamız III təsnifat mərhələsinin Bakıda keçirilən J qrupunun oyunlarında bütün rəqiblərini üstələməyi bacarıb.

Baş məşqçi Faiq Qarayevin komandası əvvəlcə İsraili 3:1, ardından Estoniyanı 3:0 hesabı ilə yenib. 3-cü turda isə millimiz 2013-cü il Dünya Qran Prisinin bürünc mükafatçısı Serbiyanı sınağa çəkib. Voleybol Mərkəzində baş tutan qarşılaşmada əvvəlcə qonaqlar 25:19, ardından meydan sahibləri 25:18 hesabı ilə üstün olub. 3-cü setdə yenə serbiyalılar 25:18 hesabı ilə önə keçsələr də, 4-cü setdə yığmamız 25:16 hesablı üstünlüklə setlər nisbətində bərabərliyi təmin edib. Görüşün taleyi “tay-breyk”də həll olunub. Millimiz 18:16 hesabı ilə qalib gələrək, 23 sentyabr – 12 oktyabrda İtaliyada təşkil olunacaq final mərhələsinə qrup lideri kimi vəsiqə qazanıb. Millimizin dünya çempionatına yüksəlməsi Avropa Voleybol Konfederasiyası tərəfindən sensasiya kimi dəyərləndirilib. Daha öncə komandamız 1994-cü il mundialında 9-cu, 2006-cı ildə isə 13-cü yeri tutmuşdu.

Avropa zonasından digər vəsiqələrə gəldikdə, Türkiyə, Belçika, Bolqarıstan və Xorvatiya qrup liderləri, Hollandiya və Serbiya ən yaxşı qrup ikinciləri kimi dünya çempionatına yüksəlib. Daha 3 ölkə təşkilatçı İtaliyadan əlavə, son Avropa çempionatının qalibi Rusiya və finalçı Almaniyadır.

Qeyd edək ki, mundialda ümumilikdə 24 ölkə təmsil olunacaq. Hələlik Asiya və Okeaniyadan Yaponiya, Tailand, Çin və Qazaxıstan, Cənubi Amerikadan isə Braziliya və Argentina da bu vəsiqələrə yiyələnib.