AVRO 2024-də hansı ölkə nə qədər qazanacaq? Mükafatın məbləği

2024-cü il Avropa Futbol Çempionatında (AVRO 2024) paylanacaq mükafatların məbləği açıqlanıb.

Lent.az-ın xarici mediaya istinadən xəbərinə görə, bütün oyunlarda qalib gələrək çempion olan komanda ümumilikdə 34 milyon avro qazanacaq.

Dünən keçirilən qarşılaşmalarla futbol üzrə Avropa çempionatının seçmə mərhələsi başa çatdığından 24 biletdən 21-i öz sahibini tapıb. 2024-cü il martın 21-26-da keçiriləcək oyunların nəticəsində müəyyənləşəcək Millətlər Liqasının pley-off mərhələsindən cəmi üç komanda qalıb.

Məlumata görə; turnirə qatılan komandalar öz sponsorluq müqavilələri ilə yanaşı, UEFA-nın mükafatları ilə də mühüm gəlir mənbəyi əldə edəcəklər. Bu il UEFA ümumi mükafat pulunda böyük sıçrayış edib və bu rəqəmi 301-dən 371 milyon avroya yüksəldib.

Hər bir iştirakçı ölkə 9,25 milyon avro ayaq basdı pulu alacaq. Qrupda hər qələbə 1,5 milyon, heç-heçə 750 min avro deməkdir... Son 16 tura yüksəlməyin mükafatı isə 2 milyon avrodur. UEFA 1/4 finala yüksələnlərin hər birinə 3,25 milyon avro mükafat verəcək.

Yarımfinalçıların hər biri 5 milyon avro, çempion olan komanda 10 milyon, finalçılar isə 7 milyon avro qazanacaq. Bu rəqəmlərin işığında qrupdakı bütün oyunları qazanaraq çempion olan ölkə xəzinəsinə 34 milyon avro qoyacaq.