Olimpiada-2012: Azərbaycanın daha 2 boksçusu ¼ finalda!

Lent.az-ın məlumatına görə, bunlar Məhəmməd Əbdülhəmidov və Teymur Məmmədovdur.

Hər iki idmançımız ¼ finala vəsiqə qazanıb. Əbdülhəmidov 1/8 finalda yaponiyalı Satoşi Şimizunu məğlubiyyətə uğradıb – 22:17. İlk iki raund boksçumuzun aşkar üstünlüyü şəraitində keçib. İlk raunddan 4:2 hesablı qələbə ilə ayrılan təmsilçimiz növbəti raundda fərqi daha da artırıb – 8:3. O, Şimizunu 2 dəfə noqdauna da salıb. Lakin sonuncu raundda boksçumuzda yorğunluq açıq-aşkar özünü büruzə verməyə başlayıb. Bununla belə, idmançımız özünü noqdaundan qorumağı bacarıb və hesabın böyük olmasına imkan verməyib – 10:12. Nəticədə Əbdülhəmidov növbəti mərhələyə yüksəlib. Onun ¼ finalda rəqibi əlcəzairli Məhəmməd Amin Udahi olacaq. Döyüş avqustun 5-də baş tutacaq.

Məmmədov isə avstraliyalı Jay Tapu Operayaya minimal fərqlə qalib gəlib – 12:11. İlk iki raund bərabər səviyyədə keçib. Əvvəlcə 5:5, sonra isə 4:4 hesablı heç-heçə qeydə alınıb. Sonuncu raundda isə daha fəal təsir bağışlayan boksçumuz üstünlüyə nail olub – 3:2. Məmmədovun ¼ finalda rəqibi belaruslu Sergey Korneyev olacaq. Bu döyüş də avqustun 5-də keçiriləcək.

Qeyd edək ki, daha öncə boksçularımızdan Soltan Migitinov (75 kq) 1/8 finala, Məhəmmədrəsul Məcidov (+91 kq) ¼ finala yüksəlib. Elvin Məmişzadə (52 kq), Heybətulla Hacıəliyev (64 kq) və Vətən Hüseynli (81 kq) isə ilk görüşdəcə uduzaraq, mübarizəni dayandırıblar.