AXCP üzvünün döyülməsinə DİN-in münasibəti

Daxili İşlər Nazirliyi (DİN) martın 10-da Bakıda keçirilən “Əsgər ölümünə son!” aksiyasında iştirak edən AXCP üzvü Renad Nəcəfovun döyülməsinə münasibət bildirib.

DİN mətbuat xidmətinin şöbə rəisi Orxan Mansurzadə APA-nın sorğusuna cavab olaraq bildirib ki, Renad Nəcəfovun polis bölməsində döyülməsi ilə bağlı bəzi kütləvi informasiya vasitələrində yayılan məlumatlar doğru deyil: “Əgər Renad Nəcəfov polis tərəfindən təzyiqə məruz qaldığını iddia edirsə, bu məsələ ilə bağlı Daxili İşlər Nazirliyinə müraciət edə bilər”.

Klinik Tibbi Mərkəzdən APA-ya verilən məlumata görə, R.Nəcəfov mərkəzdə müalicə olunur. R.Nəcəfova kəllə-beyin travması, almacıq sümüyünün sınığı, sifətində yumşaq toxumaların əzilməsi diaqnozu qoyulub.

Qeyd edək ki, R.Nəcəfov mətbuata açıqlamasında paytaxtın Fəvvarələr meydanında keçirilən “Əsgər ölümünə son!” aksiyasında polis tərəfindən döyüldüyünü bildirib.