XİN: “Leonid Slutskinin çıxışı Azərbaycan-Rusiya münasibətlərinə zərər vura bilər”
29 mart 2015 17:45 (UTC +04:00)

XİN: “Leonid Slutskinin çıxışı Azərbaycan-Rusiya münasibətlərinə zərər vura bilər”

 

 

“O, Bakıda Azərbaycan rəhbərliyi ilə keçirdiyi görüşlərdə Azərbaycan ərazilərinin işğalına son qoyulmalı olduğunu bildirib”

 

“Leonid Slutskiyə xatırlatmaq istərdik ki, onun səfər etdiyi Yerevan şəhərində faşist Almaniyasının SS birləşmələrinin generalları olan Njde Qaregin və Drasmat Kanayanın (“Dro”) şərəfinə Ermənistanın milli qəhrəmanları kimi abidələr ucaldılıb, mərkəzi meydanlardan birinə Njde Qareginin adını verilib. Leonid Slutskinin Ermənistanda görüşdüyü hakim siyasi partiyanın rəsmi ideoloji əsasını isə “Njdexeizm” təşkil edir”. APA-nın xəbərinə görə, bu sözləri Azərbaycan Xarici İşlər Nazirliyinin mətbuat xidmətinin II katibi Könül Süleymanlı Rusiya Dövlət Dumasının üzvü Leonid Slutskinin Ermənistanda keçirdiyi mətbuat konfransında söylədiyi fikirləri şərh edərkən deyib.

 

K. Süleymanlı bildirib ki, L. Slutski millət vəkili kimi öz reallıq hissini itirməyərək faşizm üzərində qələbənin 70 illiyi ərəfəsində faşizmin qurbanı olmuş milyonlarla keçmiş SSRİ vətəndaşının ruhuna hörmət əlaməti olaraq, rəsmi Yerevan qarşısında faşist generallarının “qəhrəmanlaşdırılması” və onların şərəfinə hətta Moskvada tədbirlərin keçirilməsi məsələsinə münasibət bildirməli idi: “Belə bir münasibətin bildirilməsi hələ də gec deyil. Leonid Slutskiyə onu da xatırlatmaq istərdik ki, erməni terror təşkilatı ASALA-nın təsisçilərindən olmuş və onlarla mülki insanın terror yolu ilə öldürülməsində şəxsən iştirak etmiş terrorçu Monte Melkonyanın da şərəfinə milli qəhrəman kimi Ermənistanda abidə ucaldılıb. Radikal ideologiya əsasında həyata keçirilən etnik təmizləmə siyasətinin nəticəsidir ki, Ermənistan dünyada yeganə mono-etnik dövlətdir. Ermənistan ərazisində, tarixi torpaqlarında azərbaycanlılar etnik təmizləməyə məruz qalıblar. Ermənistanda yaşayan digər millətlər də bu siyasətin qurbanı olublar. SSRİ-nin süqutu ərəfəsində Ermənistan ərazisində 28-dən artıq rus kəndi olduğu halda, indi demək olar ki, onların heç biri qalmayıb. Ermənistan-Azərbaycan münaqişəsinin həllindən danışan Leonid Slutskinin görüşdüyü Ermənistan rəhbərliyinə Azərbaycana qarşı işğal, təcavüz və qanlı etnik təmizləmə siyasətinə son soymağa dair çağırış etməsi daha təqdirəlayiq olardı. Slutskinin tarixi təhrif etməsi və siyasiləşdirməsi əvəzinə, rəhbərlik etdiyi komissiyanın gündəliyinə Xocalı faciəsini çıxarması daha düzgün addım olardı. Real rəqəmlərin fərqində olmayan Slutski regionda “silah yarışması”ndan danışır. Onun yaddaşını təzələmək istərdik ki, əhalisinin 50 faizə yaxını yoxsulluğun ən ifrat həddində yaşayan və xarici borcu ümum daxili məhsulu bir neçə dəfə üstələyən Ermənistan ÜDM-ün adam başına düşən nisbətinə görə dünyada ən çox silahlanmış dövlətdir. Ermənistanın ianələr və xarici borclar hesabına silahlanma siyasəti Azərbaycana qarşı işğal və təcavüzün saxlanmasına xidmət edir. İşğal, təcavüz və ilhaqçı siyasətinə son qoyduğu halda, Ermənistan silahlanmaya sərf etdiyi vəsaiti bərbad vəziyyətdə olan ölkənin inkişafı naminə istifadə edə bilərdi”.

 

Azərbaycan XİN-in nümayəndəsi bəyan edib ki, Leonid Slutskinin bu səpkidə çıxışı Azərbaycan ilə Rusiya Federasiyası arasında yaxın tərəfdaşlıq münasibətlərinə zərər vura bilər: “O, təhrif edilmiş formada Azərbaycanda keçirdiyi görüşlərdən danışır. Halbuki, Bakıda olduğu zaman Azərbaycanın yüksək rəhbərliyi ilə keçirdiyi görüşlərdə Azərbaycan ərazilərinin işğalına son qoyulmalı olduğunu bildirib və Azərbaycanın ərazi bütövlüyü və suverenliyinə dəstəyini ifadə edib. Onun qeyd olunan mülahizələri Azərbaycan-Rusiya əlaqələrinin ruhuna zidd olaraq, Azərbaycanın daxili işlərinə qarışmaq kimi başa düşülə bilər”.

# 39
avatar

Oxşar yazılar