Göyçayda qanunsuz taxta sexləri aşkarlandı - FOTO

Göyçayda qanunsuz fəaliyyət göstərən taxta emalı sexləri aşkarlanıb.

Daxili İşlər Nazirliyinin mətbuat xidmətinin Şəki regional qrupundan verilən məlumata görə, Baş İctimai Təhlükəsizlik İdarəsi və Göyçay rayon Polis Şöbəsinin əməkdaşları tərəfindən birgə yoxlamalar keçirilib. Bu zaman Elnur Beydullayevə məxsus Kürdəmiş kəndində yerləşən taxta emalı sexinə baxış keçirilərkən oradan 4 ədəd dəzgah, 1177 ədəd taxta yeşik, qoz və qovaq ağaclarının gövdələri aşkarlanıb.

Davam etdirilən tədbirlərlə rayonun Cəyirli kəndində də qanunsuz olaraq fəaliyyət göstərən daha 2 taxta emal edən sex müəyyən edilib. Belə ki, Əli Mahmudovun işlətdiyi sexdən 2 ədəd dəzgah, 1200 ədəd taxta yeşik, qovaq ağacının hissələri, Alim Əhmədova məxsus sexdən isə iki elektrik mişarı, qovaq, fıstıq və qoz ağaclarından hazırlanmış taxta yeşiklər aşkarlanıb.

Faktlarla bağlı Göyçay rayon Polis Şöbəsində araşdırmalar aparılır.