Bakının məşhur xəstəxanasında YANĞIN - FOTO - YENİLƏNİB

Fövqəladə Hallar Nazirliyi Respublika Neyrocərrahiyyə Xəstəxanasında baş verən yanğınla bağlı məlumat yayıb.

Nazirlikdən Lent.az-a verilən məlumata görə, bu gün saat 17:43-də Xətai rayonunda yerləşən Respublika Neyrocərrahiyyə Xəstəxanasının həyətyanı ərazisində yanğın olması barədə məlumat daxil olub. Məlumat daxil olduqdan dərhal sonra FHN-nin Dövlət Yanğından Mühafizə Xidmətinin yanğından mühafizə bölmələri yanğınsöndürmə işlərinə cəlb olunub.

Yanğınsöndürənlərin çevik müdaxiləsi nəticəsində yanğının genişlənməsinin qarşısı alınıb, yanğın saat 17:52-də söndürülüb.

İlkin məlumata əsasən, xəstəxananın həyətyanı ərazisində karton və taxta tullantıları təqribən 10 kv.m sahədə yanıb. Xəstəxana binası yanğından mühafizə olunub.

***

Saat: 18:35

Respublika Neyrocərrahiyyə Xəstəxanasından Lent.az-a bildirilib ki, yanğın xəstəxananın həyətində baş verib.

Yanğınsöndürənlərin müdaxiləsi ilə alovun qarşısı alınıb.

***

saat 18:18

Bakıda xəstəxana binasında yanğın olub.

Lent.az-ın məlumatına görə, hadisə Xətai rayonu Əhmədli qəsəbəsində yerləşən Respublika Neyrocərrahiyyə Xəstəxanasında qeydə alınıb.

Fövqəladə Hallar Nazirliyinin mətbuat xidmətinin rəhbəri Gülçin Mehdiyeva Lent.az-a bildirib ki, dərhal əraziyə Dövlət Yanğından Mühafizə Xidmətinin əməkdaşları cəlb olunub:

"Yanğının qısa zamanda ətrafa yayılmasının qarşısı alınaraq, söndürülüb".