Azərbaycandan qaçan pakistanlı ailə SELƏ DÜŞDÜ

Azərbaycan sərhədində əcnəbilər selə düşüb.

Lent.az xəbər verir ki, bu barədə Dövlət Sərhəd Xidmətinin Mətbuat Mərkəzi məlumat yayıb.

Məlumata görə, mayın 25-də saat 22:20-də “Xudat” sərhəd dəstəsinin xidməti ərazisində dövlət sərhədinin mühafizəsi tapşırığını yerinə yetirən sərhəd naryadı tərəfindən dövlət sərhədinin pozulmasına dəlalət edən əlamətlər aşkar olunub. Sərhəd zastavası dərhal “Silaha” komandasına qaldırılaraq xidməti ərazi qapadılıb, Rusiya Federasiyasının sərhəd nümayəndəliyi məlumatlandırılıb.

Dövlət sərhədini pozmağa cəhd edərkən Samur çayının təhlükəli relyefi və güclü axınında köməksiz vəziyyətdə qalaraq həyati təhlükə ilə üzləşən sərhəd pozucularının xilas edilməsi məqsədilə təxirəsalınmaz tədbirlər keçirilib, sərhədçilərin peşəkar müdaxiləsi nəticəsində onların təxliyəsi mümkün olub.

Saxlanılan şəxslərin Pakistan İslam Respublikası vətəndaşları – 50 yaşlı Begüm Raqia, 34 yaşlı Ahmed Suleyman, 25 yaşlı Sumera Süleyman Ahmed, 4 yaşlı Suleman Muhammed Sultan, 3 yaşlı Skender Muhammed Sultan olduğu müəyyənləşdirilib. Araşdırma tədbirləri nəticəsində saxlanılan şəxslərin ölkə ərazisinə rəsmi qaydada gəldikləri, dövlət sərhədini pozaraq qeyri-qanuni yollarla Avropa ölkələrindən birinə miqrasiya etmək niyyətində olduqları müəyyən edilib.