Niyə məhz SKAD: Hədəf dinc əhalidir – ARAYIŞ

Gəncənin Ermənistan ərazisindən SKAD raketi ilə vurulması öz təsdiqini tapdı. SKAD böyük dağıntılar törədən raket olduğundan, ondan hətta hərbi əməliyyatlarda da nadir hallarda istifadə edirlər, mülki şəxslərə qarşı isə ümumiyyətlə, istifadə olunmur. Ermənistanın belə bir silahdan dinc əhaliyə qarşı istifadəsi bu ölkənin faşist mahiyyətini ortaya qoyur.

Bəs nədir axı bu SKAD?

“SKAD” raketi sovet dövründə istehsal olunmuş taktiki ballistik raketdir. İlk istehsal olunmuş versiyasının adı R-11, sonrakı daha inkişaf etdirilmiş variantı isə R-17 "Elbrus" adlanır. "SKAD" adı isə bu raketin NATO kod adıdır və bu ad daha çox istifadə olunur.

Raketin sürəti maksimum 1.7 km/s-dir. “SKAD” raketi ortamənzilli ballistik raketdir və nüvə başlıqlarını da daşıya bilmək iqtidarındadır. Ümumiyyətlə, son dövrlərdə dünyadakı hərbi əməliyyatlara baxsaq, görərik ki, 500 mindən artıq sakini olan şəhərə qarşı ballistik və böyük dağıdıcı gücə malik raketin atılması çox nadir hallarda baş verir.

Bir çox xüsusiyyətlərinə görə II Dünya müharibəsi zamanı faşist Almaniyası tərəfindən istehsal olunan V-2 raketinin oxşarıdır. Raketin nüvə başlığının dağıdıcı gücü 50 kiloton hesablanıb. “SKAD” raketləri istehsal olunduğu dövrdə belə onun ehtimal olunan yayınma dairəsi 450 metr təşkil edirdi.

Bu o deməkdir ki, hər hansı nöqtəyə raketi atılanda, o, həmin nöqtədən 450 metr radiusda bir əraziyə düşəcək. Bu, raketdən hərbi hədəfləri məhv etmək üçün istifadədə çətinlik yaradır, dəqiqlik yoxdur, ona görə də hərbi məqsədlə tətbiqinin heç bir effekti yoxdur.

“SKAD” ilk dəfə 1973-cü il Yom Kippur müharibəsinin sonlarında Misir tərəfindən İsrailə qarşı istifadə olunub, nəticədə 7 nəfər İsrail hərbçisi həlak olmuşdu. Sonuncu dəfə isə 11 oktyabr 2020-ci ildə Ermənistan ərazisindən Azərbaycanın ikinci ən böyük şəhəri Gəncəyə atılıb. Nəticədə 4-ü qadın olmaqla, 9 nəfər həlak olub, aralarında uşaqlar olan 35 nəfər yaralanıb.

Sonda bir nəticəyə gəlmək olur: Gəncəyə SKAD atmaqda Ermənistanın bir məqsədi olub - məhz dinc əhalini qırmaq. Əslində, belə bir məqsədləri olduğunu Ermənistanın hərbi-siyasi rəhbərliyi heç gizlətmirdi də...