Bakıda avtomobil avtobusa çırpıldı: 6 yaralı

Sentyabrın 21-də Bakıda 6 nəfərin xəsarət alması ilə nəticələnən yol nəqliyyat hadisəsi baş verib. Bakı şəhər Dövlət Yol Polisi İdarəsindən Lent.az-a verilən məlumata görə, Xətai rayonu ərazisində minik avtomobili ilə sərnişin avtobusu toqquşub.

Məlumata görə, 1975-ci il təvəllüdlü Talıbov Kamil Natiq oğlunun idarə etdiyi 90 KO 968 nömrə nişanlı “Mercedes” 1958-ci ildə anadan olmuş Həsənov Şahhəsən Hüseyn oğlunun sürdüyü “Otoyol” markalı sərnişin avtobusuna çırpılıb.

Nəticədə “Mercedes”də olan bir ailənin 4 üzvü - sürücü 36 yaşlı K.Talıbov, həyat yoldaşı, 38 yaşlı Mənzər və oğlu Vüqar, sürücünün qardaşı, 30 yaşlı Rövşən Talıbov müxtəlif dərəcəli xəsarətlər alıblar. Sərnişin avtobusunun sürücüsü 53 yaşlı Ş.Həsənov və sərnişini, 1982-ci il təvəllüdlü İsmayılova Gülşən Məmməd qızı da xəsarət alıb. Yaralılar 3 saylı Şəhər Xəstəxanasına yerləşdirilib.

Faktla əlaqədar araşdırma aparılır.

Nizam RZA