Müdafiə Nazirliyi: Erməni hərbçilər işgəncəyə dözməyib sərhədi keçiblər

Azərbaycan Müdafiə Nazirliyi Ermənistan Ordusunun iki əsgərinin Azərbaycan tərəfə keçməsi ilə bağlı rəsmi açıqlama yayıb.

Müdafiə Nazirliyinin mətbuat xidmətinin rəisi, polkovnik-leytenant Eldar Sabiroğlu APA-ya açıqlamasında bildirib ki, Ermənistan Müdafiə Nazirliyinin tabeliyində olan 38862 saylı hərbi hissənin 7-ci dağ atıcı alayının təlim bölüyünün əsgərləri Arutunyan Ohan Varinakoviç və Tomasyan Gevork Serjikoviç 31 may 2009-cu il tarixdə saat 13.00 radələrində Azərbaycanın Goranboy rayonu ərazisində olan hərbçilərinə könüllü təslim olublar. Onlar hazırda Azərbaycan Müdafiə Nazirliyinin müvafiq hərbi hissəsində saxlanılırlar.

E. Sabiroğlu deyib ki, ilkin söhbət zamanı əsir düşən əsgərlər səbəb kimi Qarabağda onlara əziyyət verildiyini göstəriblər: “Onlar işgəncələrə dözməyərək sərhədi keçməyə məcbur olduqlarını deyiblər”.

Mətbuat xidmətinin rəisi əsgərlərin hər ikisinin Ermənistan vətəndaşı olduğunu bildirib: “Arutunyan Ohan Ermənistanın Martuni rayonunda, Tomasyan Gevorq isə Nairi rayonunda anadan olub. Hər iksi 1991-ci il təvəllüdlüdür”.