Sərxoş olub, qohumunun mal tövləsini yandırdı

Azərbaycanın Qax rayonunda yanğın baş verib. Bu barədə lent.az-a Qax rayon Polis Şöbəsindən məlumat verilib.

Məlumata görə, hadisə rayonun Qum kəndində, 1961-ci il təvəllüdlü Yusifov Nazim Musa oğlunun yaşadığı evin həyətyani sahəsində tikilmiş, uzunu 16, eni 6 metr olan mal tövləsində qeydə alınıb.

Hadisə yerinə Fövqaladə Hallar Nazirliyinin(FHN) Qax rayon Yanğından Mühafizə Hissəsinin texnikası və canlı qüvvəsi və Qax RPŞ-nin əməkdaşları cəlb edilib.

Yanğın nəticəsində Nazim Yusifova məxsuz mal tövləsinin yanar konustruksiyaları və 6 tondan yuxarı quru ot kütləsi yanaraq yararsız hala düşüb. Yanğının daha da genişlənərək həyətdəki digər tikililərə keçməsinin qarşısı alınıb.

İlkin araşdırma zamanı məlum olub ki, Nazim Yisifova məxsuz mal tövləsini onun qohumu və həmkəndlisi, 1962-ci il təvəllüdlü Yusifov Elman Əhmədyə oğlu sərxoş vəziyyətdə alışqan vasitəsi ilə yandırıb.

Qax RPŞ-nin əməkdaşlarının keçirdiyi əməliyyat tədbiri nəticəsində Elman Yusifov saxlanılıb.

Fakla bağlı Qax RPŞ-də cinayət işi başlayıb, araşdırma aparılır.

Vüqar Heydərov