Bakıya gələn avtobus yolda dondu - 27 DƏRƏCƏ ŞAXTADA ÖLÜMLƏ ÜZ-ÜZƏ...

Soçi-Bakı reysilə hərəkət edən və yolda donub qalan avtobus və sərnişinləri ilə bağlı bəzi məqamlar məlum olub. Lent.az-ın xəbərinə görə, hadisə dünən gecə saat 1 radələrində Stavropol diyarında, Koçubey—Zelenokumsk—Mineralnıe Vodı magistralında baş verib. Avtobus hərəkətdə olarkən qəfil dayanıb. Məlum olub ki, avtobusun yanacağı donub. Yolun ortasında ölüm təhlükəsiylə üz-üzə qalan sərnişinləri Rusiya Fövqəladə Hallar Nazirliyinin yerli şöbəsinin əməkdaşları xilas edib. Hadisənin baş verdiyi Stavropol diyarı Budyonovsk rayonunun rəhbərliyi sərnişinləri dərhal yaxınlıqdakı Starodubskoye kəndində yerləşən 6 saylı “Kolokolçik” adlanan uşaq bağçasına yerləşdiriblər.

Budyonovsk rayon administrasiya sədrinin müavini Marina Burinova Lent.az-ın əməkdaşıyla söhbətində bildirib ki, avtobusda 26 sərnişin olub. Onların hamısı Azərbaycan vətəndaşlarıdır.

“Gecə 1 radələrində bizə məlumat daxil oldu. Qərar verdik ki, sərnişinləri yaxınlıqdakı bağçaya yerləşdirək. Gecikmək olmazdı, onları şaxta vura bilərdi və daha ağır nəticələrə səbəb olardı. Çünki bu il bizim tərəflərdə (Stavropol diyarında) tarixdə görünməmiş şaxtalar düşüb. Dünən gecə isə 26 dərəcə şaxta vardı. Dərhal tədbir gördük. Sərnişinlər isti yemək və çayla təmin edildilər. Hadisədən sarsıntı keçirənlərə tibbi yardım göstərildi. Sərnişinlərin arasında bir hamilə qadın vardı. O, dərhal nəzarətə götürüldü. Sərnişinlərin səhər yeməyi və naharını da yerli administrasiya öz üzərinə götürüb”.

Lent.az-ın əməkdaşı avtobusun sürücüsü Vüsal Rzayevlə də əlaqə yarada bilib. Sürücünün dediyinə görə, avtobus hərəkətdə olarkən qəfil dayanıb.

“Məlum oldu ki, dizel yanacağı donub. Dərhal yerli FHN-lə əlaqə saxladım. Sağ olsunlar, tez köməyə çatdılar. Sərnişinlər bağçadadı. Biz də artıq avtobusu təmir edib bitirmişik. Bir-iki saata yola düşəcəyik”.

Vüsal Rzayevin dediyinə görə, o, illərdir Rusiya istiqamətində işləyir.

“Amma ilk dəfədir ki, belə halla rastlaşmışam. Gecə 26-27 dərəcə şaxta olacağını proqnozlaşdırmamışdıq. Şükür, yenə yaxşı qurtardıq. Don vuran, zərərçəkən olmadı. Bir azdan Bakıya yola düşürük”.

12:50

Soçi-Bakı reysilə hərəkət edən sərnişin avtobusu yolda qalıb. Lent.az-ın Rusiya KİV-ə istinadən məlumatına görə, avtobus Koçubey—Zelenokumsk—Mineralnıe Vodı trasında hərəkət edərkən qəfil dayanıb. Məlum olub ki, avtobusun içində olan yanacaq şaxtadan donub.

Avtobusun içində 20 sərnişin olub. Onlardan ikisi uşaqdır.