Tarixdə ilk: Çin və Tayvan liderləri bir arada

Bu gün Sinqapurda Çin Xalq Respublikasının yaranmasından bəri ilk dəfə olaraq Çin və Tayvan liderlərinin görüşü keçirilib.

APA-nın “Reuters”ə istinadən verdiyi xəbərə görə, Sinqapurdakı “Şanqri-la” otelində bir araya gələn Çin rəhbəri Si Tszinpin və Tayvan administrasiyasının rəhbəri Ma İntszyu medianın önündə bir-birinə əl uzadaraq görüşüblər. Pekindən verilən açıqlamada bildirilib ki, danışıqlar zamanı Tayvan boğazının iki tərəfi arasında münasibətlərin sülh yolu ilə inkişafı müzakirə olunacaq. Açıqlamada xüsusi qeyd olunub ki, görüş “vahid Çin” prinsipinə uyğun keçiriləcək.

Qeyd edək ki, Çin mərkəzi hökuməti ilə ada əyaləti arasında əlaqələr 1949-cu ildə Çindəki vətəndaş müharibəsində məğlub olan Homindanın qüvvələrinin Çan Kayşinin başçılığı ilə Tayvana qaçmasından sonra pozulub. 1980-ci illərin sonlarında işgüzar və qeyri-formal əlaqələr bərpa olunub.