Londonda terror aktı- ÖLƏNLƏRİN SAYI ARTIB - YENİLƏNİB-2

Londonda törədilən terror aktı nəticəsində ölənlərin sayı 5 nəfərə çatıb.

APA-nın məlumatına görə, bu barədə BBC London polisinə istinadən xəbər verib.

Hadisə nəticəsində yaralananların sayı isə 40-a çatıb. “Hazırda yaralıların sayı 40 nəfərdir. Onlardan bəzilərinin vəziyyəti ağır kimi qiymətləndirilir. Ümumilikdə hadisə nəticəsində 1 polis əməkdaşı daxil olmaqla 5 nəfər həyatını itirib”, deyə Skotland-Yardın terrora qarşı mübarizə bölməsinin rəisi Mark Rouli bildirib.

London polisinin nümayəndəsi həmçinin bildirib ki, terror aktını törədən şəxsin kimliyi hazırkı mərhələdə açıqlanmayacaq.

Bundan əvvəl 4 nəfərin öldüyü, 20 nəfərin yaralandığı bildirilirdi.

***

Londonda törədilən terror aktı nəticəsində ölənlərin sayı 4 nəfərə çatıb.

APA-nın məlumatına görə, bu barədə BBC London polisinə istinadən xəbər verib.

Hadisə nəticəsində azı 20 nəfər yaralanıb. Bundan əvvəl 2 nəfərin öldüyü, 12 nəfərin yaralandığı bildirilirdi.

Xatırladaq ki, naməlum şəxs Vestminster körpüsündə bir neçə nəfəri avtomobillə vurub və daha sonra parlament binasına yaxınlaşaraq polis nəfərini bıçaqlayıb. O, digər polislər tərəfindən atəş açılaraq zərərsizləşdirilib.

***

Londonda törədilən terror aktı nəticəsində ölənlərin sayı 2 nəfərə çatıb.

APA-nın məlumatına görə, bu barədə “Sky News” telekanalı xəbər verib.

Bundan əvvəl 1 qadının öldüyü bildirilirdi.

Bu gün Londonun Vestminster körpüsündə və Böyük Britaniya parlamentinin yaxınlığında iki silahlı insident baş verib.

London polisi baş verən hadisəni terror aktı kimi qiymətləndirib.

İnsident Brüsseldə törədilən terror aktının ildönümü ilə üst-üstə düşüb. 2016-cı il, martın 22-də Belçika paytaxtının hava limanı və metro stansiyasında törədilən terror aktı nəticəsində 35 dinc sakin ölüb, 3 terrorçu-kamikadze məhv edilmişdi. Hadisəyə görə məsuliyyəti İŞİD terror qruplaşması öz üzərinə götürmüşdü.

***

Londonda parlament binası yaxınlığında atışma olub.

APA-nın məlumatına görə, bu barədə “Reuters” agentliyi Böyük Britaniya parlamentindəki mənbəyə istinadən məlumat yayıb.

Atışma zamanı 2 nəfər yaralanıb. “Reuters” agentliyinin hadisə yeri yaxınlığında olan fotoqrafı isə ən azı 10 nəfərin yaralandığını bildirib. Parlament binasına gələn yollar, yaxınlıqdakı metro stansiyası bağlanıb.

London polisi parlament binası yaxınlığında baş verən hadisəni terror olayı kimi qiymətləndirib.

“Sky News” telekanalı isə Vestminster körpüsündə, parlament yaxınlığında baş verən olayların əlaqəli olduğu barədə məlumat yayıb.

Məlumata görə, bir nəfər avtomobili körpü üzərindəki insanların üzərinə sürüb, bir neçə nəfəri vurub və parlamentə yaxınlaşıb. Daha sonra avtomobildən düşən şəxs parlament binası yaxınlığında bir polisi bıçaqlayıb. O, digər polislər tərəfindən güllələnərək zərərsizləşdirilib.