Ukraynada öldürülən keçmiş qatilin təntənəli dəfninə imkan verilmədi

Zabaykal diyarının Çernışevski rayonunun Jireken qəsəbəsinin sakinləri “Vaqner”in tərkibində Ukraynadakı müharibədə həlak olan Nikita Kasatkinin təntənəli dəfn mərasimindən imtina ediblər.

Lent.az-ın xarici mediaya istinadla xəbərinə görə, “Vaqner”in tərkibində döyüşməyə aparılan məhkumun təntənəli dəfninə sakinlər etiraz etdiklərindən onunla vida mərasimi xalası oğlunun evində keçirilib.

Əvvəllər adıçəkilən qəsəbə administrasiyasının rəhbəri olan Alena Koqodeeva deyib ki, insanların cənazə mərasimini təntənəli təşkil etməyin lazım olub-olmaması ilə bağlı fikir ayrılıqları var. Onun sözlərinə görə, Kasatkin bir neçə il əvvəl qətl törətməkdə təqsirli bilinib. O qeyd edib ki, insanlar bunu unutmayıblar.

“Qəsəbənin yarısı deyir: “İndi qatillərdən qəhrəman edəcəyik?” Yarısı isə deyir ki, “O, Ukraynada günahlarını qanı ilə yuyub” Kənd iki düşərgəyə bölünüb” – Koqodeeva vurğulayıb.