Türkiyədə zəlzələdə ölənlərin sayı 76 nəfər oldu-YENİLƏNİB

Türkiyədə baş verən zəlzələ nəticəsində 76 nəfər həyatını itirib.

Lent.az-ın xəbərinə görə, bu barədə Türkiyənin Fövqəladə Halların İdarə Olunması Agentliyi (AFAD) məlumat yayıb.
Zəlzələ nəticəsində azı 440 nəfər xəsarət alıb.

***

08.21

Bazar ertəsi Türkiyənin cənub-şərqində baş verən 7,4 bal gücündə zəlzələ nəticəsində azı 51 nəfər ölüb.

Lent.az-ın xəbərinə görə, bunu təbii fəlakətdən zərər çəkmiş Diyarbəkir, Malatya, Osmaniye və Şanlıurfa əyalətlərinin valilərinin məlumatları sübut edir.

***

07.53

Türkiyənin cənubundakı Adana şəhərində güclü zəlzələ nəticəsində üç hündürmərtəbəli yaşayış binası tamamilə dağılıb.

Lent.az-ın məlumatına görə, bunu bu şəhərin meri Zeydan Karalar “Habertürk” telekanalının efirində deyib.

“3 yaşayış binası, o cümlədən 17 və 14 mərtəbəli bina tamamilə dağılıb. Xilasedicilər hələ də onlara yaxınlaşa bilməyib. Hələlik itki yoxdur”, - deyə o bildirib.

***

07.29

Türkiyədə baş verən zəlzələd ölənlər barədə ilkin məlumatlar daxil olur.

Lent.az-ın “Hürriyyet”ə istinadla xəbərinə görə, Osmaniyədə 34 bina dağılıb, azı 5 nəfər həlak olub.
Şanlıurfada ölənlərin sayı onu keçib.

Adana valisi 11 mərtəbəli binanın uçması nəticəsində ölən və yaralananların olacağını bildirib. Çukurovada 3 bina tamamilə dağılıb.

Səhiyyə naziri Fəxrəddin Qoca xilasedicilərin yaralıları dağıntılar altından çıxardıqlarını bildirib.