Akif Qurbanov: "Virusa yoluxub, səhiyyəyə yük olmayaq, xəstəxana yerlərini doldurmayaq"
22 oktyabr 2020 11:56 (UTC +04:00)

Akif Qurbanov: "Virusa yoluxub, səhiyyəyə yük olmayaq, xəstəxana yerlərini doldurmayaq"

“Koronavirusa yoluxma saylarının artması bir sıra amillərdən asılıdır. Birincisi, soyuq fəsildir, qış fəsli gəlir. Soyuq fəsillərdə adətən tənəffüs infeksiyalarının artması müşahidə olunur, o cümlədən, COVID, qrip və qripəbənzər xəstəliklər arta bilər”. 

Bunu APA-ya TƏBİB-in V.Y.Axundov adına Elmi-Tədqiqat Profilaktika İnstitunun elmi işlər üzrə direktor müavini Akif Qurbanov deyib. O bildirib ki, son günlər təmaslar da artıb: “Demək olar ki, artıq sərt karantin rejimi yoxdur. Yəni təmaslar artıb, yaxın günlərə qədər məktəblərdə tədris adi qaydada davam etdirilirdi. Üçüncü isə insanların bu qaydalara riayət etməməsidir. Bunun da səbəblərindən biri odur ki,  son günlər müharibə ilə bağlı sanki xəstəlik psixoloji olaraq ikinci plana keçdi. Ona görə bu amillər hamısı yoluxma sayının atmasına gətirib çıxarır. Amma hazırda yoluxma sayının artımında günahlarımızı özümüz aradan qaldırmalıyıq. Çünki yoluxma sayının artımı olanda xəstəxanalar, səhiyyə sistemi yüklənməyə başlayır, bu dəqiqə hamımız səhiyyə sistemimizə əlavə yüklənməməyə çalışmalıyıq. Çünki səhiyyə sistemimiz hazırda müharibənin nəticələrinə xidmət etməlidir. Səhiyyə daha çox  bu işlərlə məşğul olmalıdır. Biz də virusa yoluxub, səhiyyəyə yük olmayaq, xəstəxana yerlərini doldurmayaq. 

Elə edək ki, hamımız birlikdə yaxşı qorunaq, yoluxma sayları həddən çox olmasın ki, insanlar xəstəxanaya çox müraciət etməsinlər. Klinikalar boş olsun, lazım gəldikdə onlar yararlılara xidmət göstərsinlər”.

A.Qurbanov qeyd edib ki, COVID-dən qorunma tədbirlərinə əməl etmək bu dəqiqə vətənpərvərlik hisslərinin ən yaxşı ifadəsidir: “İndi əvvəlkindən daha yaxşı başa düşməliyik ki, müharibə gedir, arxa cəbhədə heç bir problem olmamalıdır. Hamımız buna dəstək göstərməliyik ki, ordumuz qələbələrini davam etdirsin. Bu gün kimsə maska taxmır, məsafə saxlamır və gigiyena qaydalarına əməl etmirsə, demək, onda vətənpərvərlik hissi yoxdur”. 

Direktor müavini şəhidlərin yas mərasimlərində iştirak edənlərə də müraciət edib: “Şəhidlərimiz var, Allah rəhmət eləsin. Sözsüz ki, cəbhədə ağır yararlananlar da var. Müharibənin qayda-qanunu belədir. Müharibə itkisiz, yaralanansız olmaz. Bunu hamı bilir. Düzdür, insanlarımız da istər şəhidlərin, istərsə də yaralıların olmasına qarşılıqlı anlayış göstərirlər. Çünki bizim insanlar çox vətənpərvərdir. Hamı deyir ki, təki Vətən sağ olsun, torpaqlarımız azad olunsun. Bu hissləri biz hamıda görürük.  Bu, doğrudan da çox yüksək hisslərdir. Yaralıların yanına gələnlər, onlara baş çəkənlər, şəhidlərimizin dəfn mərasimində iştirak edənlər olur. Amma bu zaman heç kəs qorunma tədbirini yadından çıxarmamalıdır. Bəzən şəhidlərimizin yaxın adamları virusdan qorunmanı fikirləşə bilmirlər, biz onları başa düşürük. Amma onlar həm də bilməlidir ki,  bu gün bir itkimiz varsa, sabah bir neçə itki əlavə oluna bilər. Koronavirusdan da qorunmaq lazımdır. Həmin məclislərdə iştirak edənlər hamısı  bir nəfər kimi bilməlidirlər ki,  bizim aramızda gözə görünməyən bir düşmən də var. O gözə görünməyən düşmənlə mübarizə qaydasını da bilirk. Cəbhədəki düşmənimiz gözəgörünəndir. Gərək bu məsələlərin hamısını insanlar yaxşı bilsin. Hazırda cəbhədə olmayan insanların qarşısında bir vəzifə var, o da virusdan qorunmaq. Koronavirusdan qorunmaqla biz özümüzü, ətrafdakıları qoruyuruq və arxa cəbhədəki işlərin bir hissəsini öz üzərimizə götürmüş oluruq”.  

# 454
avatar

Oxşar yazılar