Psixoaktiv maddələr qəbul edənlər koronavirusdan necə qorunur?

"Hal-hazırda bütun dünyanı cənginə alan COVİD-19 virusu narkoloji xəstələrin müalicəsi prosesində bəzi çətinliklər yaratsa da, Respublika
Narkoloji Mərkəzin heyəti xəstələri qorumaq üçün əllərindən gələni edirlər".
Lent.az xəbər verir ki, bunu Səhiyyə Nazirliyi Respublika Narkoloji Mərkəzinin şöbə müdiri Zamin Əliyev Narkomaniyaya və Narkobiznesə qarşı Beynəlxalq Mübarizə Günü Azərbaycan Dövlət Televiziyasına müsahibəsində bildirib.
O bildirib ki, psixoaktiv maddələrin qəbuledicilərinin immun sistemi zəif və bədən müqavimətləri çox aşağı olduğundan yoluxma təhlükəsi dəfələrlə artır, olduqca təhlükəli fəsadlar verə bilər:"Məhz buna görə mərkəzimizin qəbul şöbəsində, ilkin olaraq, xəstələrin bədən hərarətləri ölçülür, anamnestik məlumatlar toplanılır və rentgen müayinəsi edildikdən sonra Narkoloji Mərkəzə yerləşdirilir. Azərbaycan ərazisində hazırda tətbiq olunan xüsusi karantin rejiminin qaydalarına əsasən xəstə ziyarətlərinə yol verilmir”.