Öldürə bilər: Son zamanlar təyyarədə yaranan məşhur tendensiya

Son zamanlar sosial şəbəkələrdə hava səyahəti zamanı "raw dogging" adlı qəribə tendensiyaya getdikcə daha çox rast gəlmək olur. Onun mahiyyəti ondan ibarətdir ki, sərnişinlər uzun uçuşlar zamanı rahatlıqdan imtina edirlər - onlar musiqi dinləmir, kinoya baxmır, telefondan istifadə etmir, kitab oxumur, yatmır, yemək yemir, içmir, tualetə belə getmir. Sadəcə bir mövqedə oturub və bir nöqtəyə, məsələn, təyyarə marşrutu olan xəritəyə baxır.

Lent.az xarici KİV-ə istinadən xəbər verir ki, versiyalardan birinə görə, bu tendensiyanın yaranması 2023-cü ilin yayında "Apple TV+"da premyerası olan "Hijack" serialı ilə əlaqələndirilir.

Hekayədə İdris Elbanın personajı, danışıqlar üzrə ekspert Sem Nelson, təyyarənin cinayətkarlar tərəfindən qaçırılmasından sonra Dubaydan Londona yeddi saatdan çox uçuşa heç bir şərait olmadan dözmək məcburiyyətində qalır. Vaxt keçdikcə məşhurlar və bloqerlər bu tendensiyaya qoşulur. Məsələn, bu yaxınlarda Norveçli futbolçu, İngiltərənin "Mançester Siti " klubunun hücumçusu Erlinq Haalandın yeddi saatlıq uçuş zamanı monitordakı xəritəyə baxdığı iddia edilib.

Bununla belə, qidalanma mütəxəssisi Toby Kinq uçuş zamanı aç qalmağın əslində olduqca təhlükəli olduğunu deyib. Çünki qan laxtalanma riskini artıra, ağciyərlərdə arteriyaların qopmasına və tıxanmasına səbəb ola bilər. Nəticəsinin isə ölüm olma ehtimalı yüksəkdir:

"Bu, bir müddətdir sosial mediada gördüyüm ən təhlükəli tendensiyalardan biridir və zahirən günahsız və bir az gülməli görünsə də, ölümcül nəticələrə səbəb ola bilər və insanları səyahət edərkən həssas olmağa çağırıram" mütəxəssis bildirib.

Həm də hava təcili yardım maşınlarında tibbi müşayiətçi kimi çalışan Jenkins mütəxəssisin fikirlərini təkrarlayır. Doktor Jenkinsin izah etdiyi kimi, uzun məsafəli uçuşların əsas riski sərnişinlərin susuzluğu ilə bağlıdır.

"Hərəkət etməsəniz, dərin damarların trombozu riski var və bu, susuzlaşdırma nəticəsində daha da pisləşir. Tualetə getməmək bir az axmaqlıqdır. Əgər tualetə getməlisənsə, bunu saxlamaq olmaz" - vurğulayıb.

Səyahət mütəxəssisləri də bu tendensiyanın əleyhinə çıxış ediblər:

"Məsləhətimiz uçuşunuzdan həzz almaqdır. Uçuşlar zamanı aşağı oksigen təzyiqi və rütubət səviyyəsinin dəyişməsi səbəbindən dərimizdən və ağciyərlərimizdən daha çox su buxarlanır, ona görə də uçuşlar zamanı maye içmək getdikcə daha vacib olur".