Səbail rayonunda yeniyetmələrin yay istirahəti təşkil olunub

Şagirdlərin yay istirahətinin səmərəli təşkili ilə bağlı Səbail rayon İcra Hakimiyyətinin təşəbbüsü ilə avqust ayında xeyli məktəblinin Quba rayonunda istirahəti təşkil edilib. Səbail RİH-dən Lent.az-a verilən məlumata görə, Səbail rayon İcra Hakimiyyəti, Daxili İşlər Nazirliyi Daxili Qoşunları, «Çağ Öyrətim İşlətmələri» və «Azercell» şirkətlərinin birgə layihəsinə əsasən rayonun Qarabağ müharibəsi veteranları və əlillərinin övladları, rayonun aztəminatlı ailələrindən, həmçinin «SOS-Azərbaycan» uşaq kəndində və müxtəlif uşaq evlərində tərbiyə alan, ümumilikdə 200 nəfər uşaq Quba şəhərinin ən mənzərəli yerində yerləşən Bakı Türk Liseyinin Quba filialının ərazisində artıq 8-ci dəfə təşkil olunmuş hərbi-vətənpərvərlik təmayüllü «Şahinlər» yay istirahət düşərgəsinə yola salınıb.

Düşərgənin hərbi-vətənpərvərlik təmayüllü olması nəzərə alınaraq RİH tərəfindən əvvəlcədən bir sıra təşkilati işlər həyata keçirilmiş, uşaqlar üçün xüsusi geyim və forma, lazımi idman ləvazimatları alınıb, Daxili Qoşunların Quba şəhərindəki «N» saylı hərbi hissəsi tərəfindən düşərgənin həyətində hərbi-səhra çadırları, Daxili Qoşunlar, DQ-ın yaranması, vəzifələri və döyüş yolu, buradakı xidmət, döyüş texnikası və təminatı barədə, həmçinin Milli Qəhrəman Mübariz İbrahimova və «Şahinlər» düşərgəsinin əvvəlki illərinə həsr olunmuş stendlər quraşdırılıb, Daxili Qoşunlar və Bakı Türk Liseyinin Quba filialı tərəfindən bura tələb olunan bütün ləvazimatlarla təmin olunub. Düşərgədə uşaqların istirahətinin, daha da maraqlı və yaddaqalan edilməsi üçün burada məşğələlər hərbi nizamnaməyə uyğun tərzdə keçiriləcək, həmin məşğələləri və düşərgədəki təlim-tərbiyə işlərini rayonun orta məktəblərində çalışan idman və ibtidai-hərbi hazırlıq müəllimləri ilə yanaşı Daxili Qoşunlar tərəfindən xüsusi olaraq düşərgəyə təşkim olunmuş zabit və çavuşları keçəcəklər. Şagirdlər istirahət dövründə Qubanın görməli yerlərinə, meşələrə, rayonun tarixi guşələrinə gəzintilər də təşkil olunacaq, şagirdlər Daxili Qoşunların Qubadakı hərbi hissəsi ilə yaxından tanış olacaqlar.

Düşərgədə məktəblilərə Vətənimizin, xalqımızın tarixindən bəhs edən «Vətən sevgisi» dərsləri çərçivəsində «Azərbaycanın tarixi və siyasi coğrafiyası», «Azərbaycanın bu günü və gələcəyi», «Müasir Azərbaycan Ulu Öndərimiz Heydər Əliyevin şah əsəridir» mövzularında, həmçinin yeniyetmələrin hərbi vətənpərvərlik tərbiyəsi istiqamətində «Azərbaycan Ordusu: nizam-intizam hərbçilərə xas olan vacib xüsusiyyətdir», «Dağlıq Qarabağ problemi və müasir dünya» mövzularında məşğələlərin keçirilməsi və hərbçilərin bilavasitə iştirakı ilə ibtidai hərbi hazırlıq, mülki müdafiə və ilk tibbi yardım təlimləri də təşkil olunması planlaşdırılıb. Tədbir Daxili Qoşunların hərbi orkestri tərəfindən Azərbaycan Respublikasının Dövlət Himninin ifası ilə başlanıb. Səbail rayon rəhbərliyi, DİN Daxili Qoşunlar Komandanlığının, «Çağ Öyrətim İşlətmələri» Şirkətinin, düşərgəyə yollanan yeniyetmələrin, onların valideynlərinin, rayon ictimaiyyətinin nümayəndələrinin iştirakı ilə «Sahil bağı»nda təşkil olunan yolasalma mərasimində çıxış edən Səbail rayon İcra Hakimiyyətinin Başçısı Asif Əsgərov ölkə başçı cənab İlham Əliyevin yeniyetmə və gənclərin sağlam böyüməsi, gənc nəslin vətənə məhəbbət, Azərbaycan dövlətçiliyinə sədaqət ruhunda tərbiyə olunması istiqamətində gördüyü işlərdən, yeniyetmələrə olan diqqət və qayğıdan danışıb, onlara şən və yaddaqalan istirahət arzulayıb. Bildirilib ki, düşərgənin fəaliyyəti Səbail RİH və digər təşkilatçıların daimi diqqət mərkəzində olacaq və burada istirahət üçün hər cür şərait yaradılacaq. Daxili Qoşunların orkestrinin marş sədaları altında yeniyetmələr valideynləri ilə görüşüb avtobuslara əyləşib və Qubaya yola düşüblər.