Doqquz Roma Papası görən qadın: Dünyanın ən yaşlı rahibəsi uzunömürlülüyün sirrini bölüşür

ABŞ-ın Nyu-York ştatının Long-Aylend bölgəsində yaşayan Frensis Dominici Piskatella 112 yaşında dünyanın ən yaşlı rahibəsi kimi Ginnesin Rekordlar Kitabına düşüb. O, Katolik Kilsəsinə 94 ildən çox xidmət edib.

Lent.az xarici mediaya istinadla xəbər verir ki, Frensis 1913-cü il aprelin 20-də anadan olub və 17 yaşında Dominikan ordeninə qoşularaq müəllim və idarəçi kimi fəaliyyətə başlayıb. O, təhsilə 52 ilini həsr edib və 84 yaşına qədər işləyib. 1931-ci ildən bu yana o, 9 Papa, 20 ABŞ prezidenti, iki dünya müharibəsi və bir neçə pandemiyanın şahidi olub.

Xidmətə həsr olunmuş ömür

Frensis İtaliyadan köçmüş immigrant bir ailədə böyüyüb. Uşaqlıqdan başqalarına kömək etməklə tərbiyə olunub. Məktəbi bitirdikdən sonra dini həyata çağırıldığını hiss etdiyini deyən Frensis, iki yaşında sol qolunun böyük hissəsini itirməsinə baxmayaraq, rahibə olmaq istəyindən əl çəkməyib. O dövrdə bəzi monastırlar fiziki məhdudiyyəti səbəbilə onu qəbul etmək istəməyib.

Frensis 2022-ci ildə verdiyi müsahibəsində belə demişdi: "Heç vaxt kiminsə köməyinə ehtiyac duymamışam. Monastıra daxil olanda sübut etməli idim ki, mən hər şeyi bacarıram".

Bütün maneələrə baxmayaraq, o, Sankt-Cons Universitetində bakalavr və magistr dərəcəsi alıb.

Uzun ömrün sirri və pozitivlik

Hazırda rahibə Frensis daha sakit həyat yaşayır, hər gün dua mərasimlərinə qatılır və həftəlik tədbirlərdə iştirak edir. 102 yaşında avtomobil qəzası keçirərək bud sümüyünü dəyişdirib, həmçinin yıxılma nəticəsində beyin qanaması keçirsə də, zehni aydınlığını qoruyur.

112 illik yubileyində o, sevimli italyan yeməklərinin hazırlanmasını istəyib. Ondan uzunömürlülüyün sirri soruşulduqda isə sadəcə dörd sözlə cavab verib: "Ölənə qədər öyrət".

Həmçinin zarafatla əlavə edib: "Fikrimcə, Tanrı məni hələ istəmir. Sadəcə mənim yaxınlıqda olmamı istəyir".