Bakıda SPİRT KABUSU: İnsanlar niyə ölür? – AÇIQLAMA

Bakıda son 10 gündə 20-dən çox insan metil spirtindən zəhərlənərək ölüb.

Bu insanlar niyə zəhərlənir? Hansı spirtlərdən istifadə etmək təhlükəsizdir?

Mövzuyla bağlı Lent.az-a danışan qida eksperti İlkin Şirinov bildirib ki, metil spirti qidalanma, insanın daxilinə qəbulu üçün təhlükəlidir:

“Metil spirti texniki spirtlərin sırasına daxildir. Bu spirtlər metanoldan alınır. Metil spirti qanda zəhərlənməyə gətirib çıxara bilər. Etil spirti istifadə üçün haradasa qəbul oluna bilər, lakin metil metanoldan alınır və onun qida kimi istifadəsi yolverilməzdir. Bu, texniki spirt sayılır və texniki vasitələrin təmizlənməsində, yuyulmasında istifadə olunur. Yəni metil spirti birmənalı şəkildə qəbuledilməzdir”.

Ekspertin sözlərinə görə, spirtli vasitələrin istifadəsində xüsusi lisenziyalar lazımdır:

“Yalnız xüsusi labarator müayinələrdən keçmiş, Azərbaycan Qida təhlükəsizliyi Agentliyinin birbaşa icazəsi olan spirtli içkilərin istifadəsi qəbulediləndir.

Lakin kimsə texniki spirti alıb içirsə, buna heç kim cavabdeh deyil”.

Kütləvi ölümlərə görə spirt istehsalçısı məsuliyyətə cəlb edildi

Qeyd edək ki, Baş Prokurorluq Bakıda kütləvi insan ölümünə səbəb olan spirtin istehsalını həyata keçirən sahibkarın həbs edildiyini açıqlayıb.