Dondurmalarla bağlı bir gündə ikinci xəbərdarlıq

Lent.az-ın İqtisadi İnkişaf Nazirliyinin rəsmi saytına istinadən verdiyi məlumata görə, İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti əhalini “Dədə Qorqud” Müstəqil Kiçik Müəssisəsində, “Rah-96” və “Qranit” firmalarında istehsal edilən dondurmaları almamağa çağırıb.

Nazirliyin məlumatında qeyd olunur ki, Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən “Dədə Qorqud” Müstəqil Kiçik Müəssisəsinə, “Rah-96” və “Qranit” firmalarına məxsus istehsalat sahələrində aparılan yoxlamalar zamanı mövcud qanunvericiliyin tələblərinə əməl edilmədən dondurma istehsal olunması, habelə bu dondurmaların fiziki-kimyəvi və mikrobioloji göstəricilərinin normativ-texniki sənədlərin tələblərinə uyğun olmaması ilə əlaqədar dondurma istehsalı və satışının dayandırılması barədə bu təsərrüfat subyektlərinə icrası məcburi göstəriş verilib.

Bu müəssisələrdə istehsal edilmiş dondurmaların insanların, xüsusilə də uşaqların sağlamlığı üçün ciddi təhlükə mənbəyi olduğunu nəzərə alaraq, “Dədə Qorqud” Müstəqil Kiçik Müəssisəsinə, “Rah-96” və “Qranit” firmalarına dondurma istehsalı üçün verilmiş gigiyenik və uyğunluq sertifikatlarının ləğv edilməsi ilə bağlı İqtisadi İnkişaf Nazirliyi tərəfindən müvafiq orqanlar - Səhiyyə Nazirliyi və Standartlaşdırma, Metrologiya və Patent üzrə Dövlət Komitəsi qarşısında məsələ qaldırılıb.

Qeyd edək ki, nazirlik bu gün əhalini fiziki şəxs Tahir Qasımov tərəfindən istehsal edilmiş dondurmaları almamağa da çağırıb.