Elektrik kabel və naqillərinin satışının qanunauyğunluğu yoxlanılır

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən Bakı şəhəri, Nəsimi rayonu, S.Vurğun küçəsi, ev 73 ünvanında Vüqar Bağırova məxsus mağazada aparılan yoxlama zamanı üzərində “Made in United Arab Emirates” yazılmış elektrik naqillərinin mənşəyini təsdiq edən sənədlər və uyğunluq sertifikatı, “Azərgöktel” MMC-nin istehsalı olan elektrik naqillərinin və “Türksan kablo” elektrik naqillərinin uyğunluq sertifikatı olmadan satıldığı, habelə “Türksan kablo” elektrik naqillərinin etiketində istehsalçı barədə məlumatların göstərilmədiyi aşkar edilib.

Lent.az-ın İqtisadi İnkişaf Nazirliyinin rəsmi saytına istinadən verdiyi məlumata görə, üzərində “Made in United Arab Emirates” yazılmış elektrik naqillərinin etiketində Azərbaycan dilində müvafiq məlumatların göstərilmədiyi müəyyən olunub.

Aşkar olunmuş pozuntularla əlaqədar, mağazada aşkar edilmiş 8900 metr elektrik naqillər qanuna müvafiq tədbirlər görülənədək satışdan çıxarılaraq məsul saxlanmaya götürülüb.
Araşdırmalar davam etdirilir.