"Təzə Pir" məscidi rəsmi açılışa hazırdır

Tamamilə yenidən qurulan məscidin 280 kvadratmetrlik sahəsi qızıl suyuna çəkilmiş təbəqə ilə bəzədilib

Uzun müddətdir əsaslı təmirə dayanmış "Təzə Pir" məscidinin gələn həftə rəsmi açılış mərasimi keçiriləcək. Bazar ertəsinə planlaşdırılan mərasimdə prezident İlham Əliyevin də iştirak edəcəyi gözlənilir.

Lent.az-ın məlumatına görə, artıq bu dini ibadət mərkəzində əsaslı təmir və yenidənqurma işləri tam başa çatdırılıb. Belə ki, ötən əsrin əvvəllərində inşa olunmuş birmərtəbəli binasının sökülməsi və “Təzə Pir” məscidi tarix-memarlıq abidəsinin ətrafının genişləndirilməsi hesabına daha bir bina tikilib.

“Təzə Pir” məscid kompleksi çərçivəsində idarə üçün tikilmiş inzibati bina Şərq memarlığı üslubunda tikilib. Burada iş otaqları ilə yanaşı, konfrans salonu, kitabxana, arxiv, kompüter və muzey mərkəzləri də inşa olunub.

Xatırladaq ki, Azərbaycanda ilk dəfə olaraq məscidin minarəsinin və türbəsinin bir hissəsi qızılı boya, 280 kvadrat metrlik sahəsi isə qızıl suyuna çəkilmiş təbəqə ilə örtülüb. Məscid kompleksinə həmçinin 3 böyük bina daxildir. Onlardan biri İslam Universitetinin binası, biri Qafqaz Müsəlmanları İdarəsinin mərkəzi ofisi, digəri isə dini mərasimlərin keçirilməsi üçün nəzərdə tutulub.

Elxan SALAHOV