Azərbaycanda “donuz qipi”nə dair monitorinq başa çatıb

388 qan nümunələrinin heç birində A/H1N1 virusu aşkarlanmayıb

Kənd Təsərrüfatı Nazirliyi yanında Dövlət Baytarlıq Xidməti (DBX) ölkə ərazisində saxlanılan donuzlar arasında A/H1N1 virusunun müəyyənləşdirilməsi məqsədilə aprelin 27-dən başladığı monitorinqi başa vurub. Monitorinq zamanı seçmə üsulla götürülmüş 388 qan nümunələri Respublika Baytarlıq Laboratoriyasında müayinə olunub.

DBX-nin mətbuat xidmətinin Lent.az-a bildiriblər ki, monitorinq bütün ölkə ərazisi üzrə həyata keçirilib. Bu gün başa çatmış müayinələrin nəticəsində qan nümunələrinin heç birində A/H1N1 virus xəstəliyinin daşıyıcısı tapılmayıb. Həmçinin monitorinqin aparıldığı dövrdə donuzçuluq təsərrüfatlarının heç birində nə xəstə, nə də xəstəlikdən tələf olan heyvanlara rast gəlinməyib.

Bununla belə, DBX A/H1N1 virus xəstəliyinin Azərbaycana keçmə ehtimalını hər zaman diqqət mərkəzində saxlayır. Bu səbəbdən də ölkə miqyasında belə monitorinqlər ardıcıl olaraq, davam etdirəcək. Növbəti monitorinqə iyunun 1-də start veriləcəyi nəzərdə tutulur.

Xatırladırıq ki, xəstəliyin profilaktikası üçün ölkədə dərman vasitələrinin, dezinfeksiyaedici maddələrin, həmçinin fərdi qoruyucu vasitələrin ehtiyatı yaradılıb. Həmçinin rayon (şəhər) baytarlıq idarələrinə, ərazilərində fəaliyyət göstərən donuzçuluq təsərrüfatlarında xəstəliyə qarşı baytarlıq-sanitariya tələblərinə uyğun tədbirlərin həyata keçirilməsi ilə bağlı tapşırıqlar verilib.

DBX əhalinin nəzərinə çatdırır ki, hazırda A/H1N1 virus xəstəliyinə görə Azərbaycanda epizootik vəziyyət sabitdir və bu məsələ daim nəzarətdə saxlanılır.

Elxan SALAHOV