Qardabani müəllimləri etiraz aksiyası keçirib

Dekabrın 11-də azərbaycanlıların kompakt yaşadığı Qardabani şəhərində icra hakimiyyətinin qarşısında 80 müəllim etiraz aksiyası keçirib.

APA-nın Gürcüstan bürosunun məlumatına görə, onlar Qardabani və ətraf kəndlərə sərnişin daşıyan avtobuslardan müəllimlərin istifadə edilməsinin ləğv olunmasına etiraz ediblər. Etirazçıların sözlərinə görə, icra hakimiyyətində onlara bildirilib ki, dekabrın 12-dən 2013-cü ilin əvvəlinədək müəllimlərin istifadə etdiyi avtobuslar pullu olacaq. Müəllimlər deyirlər ki, iki həftə üçün avtobuslara 640 lari məbləğində yanacaq lazımdır. “Bu məbləğ büdcəyə görə, çox az məbləğdir. Ona görə də bu məbləğ çətinlik yarada bilməz.”

Gürcüstan reinteqrasiya məsələləri üzrə dövlət nazirinin Kvemo-Kartli üzrə müşaviri Savalan Mirzəyev APA-ya açıqlamasında müəllimlərin bir qrupunun Qardabani rayon bələdiyyə sədri Giorgi Xurtsilava və Qardabanidən seçilən parlamentin majoritar deputatı Giorgi Peikrişvili tərəfindən qəbul edildiyini və onların ərizəsinə müsbət cavab verildiyini bildirib: “Mən etiraz aksiya iştirakçılarının tələbləri ilə tanış oldum. Rayon bələdiyyəsindən mənə xəbər verdilər ki, dekabrın 12-dən Qardabanidə və ətraf kəndlərdə yaşayan, çalışan gürcü və azərbaycanlı müəllimlər avtobuslardan pulsuz istifadə edəcəklər”.