Alkoqol erkən ölümə səbəb olur

Alimlər müəyyən ediblər ki, erkən ölüm hallarının ən aşağı faizi həyatı boyu spirtli içkilərdən imtina edənlər arasında olub.

Lent.az xarici mətbuata istinadən xəbər verir ki, araşdırmalara görə, istənilən miqdarda spirtli içki qəbul etmək müxtəlif növ xərçəng, qaraciyər xəstəliyi və insult da daxil olmaqla, vaxtından əvvəl ölümün müxtəlif səbəbləri riskini əhəmiyyətli dərəcədə artırır.

Müvafiq olaraq, spirt istehlakı (hətta “orta”) birbaşa sağlamlıq nəticələri və vaxtından əvvəl ölüm riski ilə bağlıdır.

Son illərdə alkoqolun faydaları ilə bağlı araşdırmalar xüsusilə populyarlaşıb. Təkcə 2021-ci ildə 60-a yaxın oxşar elmi məqalə elan edilib. Məlum olub ki, onların hamısı ya birbaşa alkoqol sənayesi tərəfindən maliyyələşdirilib, ya da alkoqol sənayesi ilə əlaqəsi olan tədqiqatçılar tərəfindən işə götürülüb.

Məsələn, bir neçə il əvvəl Seattledakı Vaşinqton Universiteti alkoqolun 40 yaşdan yuxarı insanlar üçün faydalı ola biləcəyini söylədi. Bu işə görə, gündə bir stəkan qırmızı şərab potensial olaraq ürək xəstəliyi, insult və diabet riskini azaldır.

Bununla belə, bütün əvvəlki araşdırmaların təhlilinə əsaslanan hazırkı araşdırma spirtin sağlamlıq üçün hər hansı faydasını təkzib edir. Problem ondadır ki, keçmiş tədqiqatlar ciddi metodoloji qüsurları nəzərdən qaçırıb. Əsas problemlərdən biri o idi ki, içki içməyən qruplar arasında ölüm riski çox vaxt həddən artıq qiymətləndirilib, çünki bura sağlamlıq səbəbi ilə içməyi dayandıran xeyli sayda alkoqolik daxildir.