Alimlər yorğunluğun daha bir səbəbini AÇIQLADILAR

Alimlər, yorğunluq maskasının altında hansı təhlükəli xəstəliyin gizlənə biləcəyini müəyyən ediblər.

Lent.az xarici mediaya istinadən xəbər verir ki, Boris Modrau tərəfindən Oğborg Universiteti Xəstəxanasında aparılan araşdırma əvvəllər tranzitor (keçici) isemik hücum (TİA) keçirmiş 354 iştirakçını əhatə edib və orta yaşları 70 olub.

Araşdırma iştirakçıları, əvvəlcə TİA-dan sonra iki həftə ərzində, sonra isə üç, altı və on iki ay sonra yorğunluq səviyyəsini qiymətləndirmək üçün anket doldurublar. Məlumatların təhlili göstərdi ki, iştirakçıların 61%-i hadisədən dərhal sonra müəyyən dərəcədə yorğunluq hiss etmişdi və təxminən 54%-i bu simptomu növbəti bir il ərzində bütün müşahidə mərhələlərində davamlı olaraq yaşayıb.

Araşdırma maraqlı şəkildə göstərdi ki, davamlı yorğunluğu olan iştirakçılarla bu problemi yaşamayanlar arasında MRT üzərindən nəzərə çarpan fərqlər aşkar edilməyib, bu da fiziki beyin zədələrinin bu vəziyyətin əsas səbəbi olmadığını göstərir.
Eyni zamanda, xroniki yorğunluqdan şikayət edənlərdə narahatlıq və depressiya əlamətləri iki dəfə daha çox aşkar olunub. Bu, TİA sonrası yorğunluğun davam etməsində psixo-emosional amillərin mümkün roluna işarə edir.

Əldə edilən məlumatlar TİA-nın qısa müddətli və heç bir nəticə buraxmayan bir hadisə olduğu barədə mövcud fikirləri şübhə altına alır. Əksinə, araşdırma, xüsusən də xroniki yorğunluq kimi davamlı simptomların ümumi sağlamlığı əhəmiyyətli dərəcədə pisləşdirə və həyat keyfiyyətini azalda biləcəyi üçün, xəstələrin uzunmüddətli tibbi müşahidəsini önə çəkir.

Alimlər, TİA-dan sonra xəstələrin idarə olunması ilə bağlı mövcud tibbi protokolların yenidən nəzərdən keçirilməsini və bu protokollara yorğunluq və psixo-emosional vəziyyətin müntəzəm qiymətləndirilməsinin daxil edilməsini təklif edirlər.

Onların fikrincə, uzunmüddətli nəticələrin mümkünlüyünün qəbul edilməsi, daha kompleks dəstək göstərməyə və xəstələrin bərpa keyfiyyətini artırmağa imkan verəcəkdir.