Azərbaycan musiqisi Berlin Filarmoniyasında səsləndi

Konsert Mədəniyyət və Turizm Nazirliyinin və Dövlət Neft Şirkətinin dəstəyi, Azərbaycan Milli Musiqi Şurasının, Azərbaycanın Almaniyadakı səfirliyinin təşkilatçılığı ilə baş tutub.
Mədəniyyət və Turizm NAzirliyindən Lent.az-a verilən məlumata görə, konsertdən öncə Azərbaycanın Almaniyadakı səfiri Pərviz Şahbazov qonaqları salamlayıb. O bildirib ki, 93 il əvvəl qurulmuş, dövrünün qadınlara siyasi hüquqlar verilməsi kimi ən qabaqcıl liberal ideyalarına söykənən Azərbaycan Xalq Cümhuriyyəti İslam və türk dünyasında ilk dünyəvi dövlət olub. Son 10 ildə Almaniya və Azərbaycan arasında münasibətlərin genişləndiyini deyən səfirin sözlərinə görə, həmin əlaqələrdə mədəniyyətin payı az deyil. P.Şahbazovun sözlərinə görə, Azərbaycan elə bir ölkədir ki, burada musiqi hər bir insanın həyatının bir parçasına çevrilib.

AFR xarici işlər naziri Kornelia Piper və Litvanın Almaniyadakı səfiri Mindauqas Butkus da salamladıqdan sonra konsert başlayıb.
Dirijor Azad Əliyevin rəhbərliyi altında Litva Milli Simfonik Orkestri, solo ifaçılar Fərhad Bədəlbəyli (fortepiano) və Sergey Krılov (skripka) Üzeyir Hacıbəylinin “Koroğlu” operasından uvertüranı ifa ediblər. Bundan əlavə, Fikrət Əmirovun “Azərbaycan kapriççiosu”, Fikrət Əmirov və Elmira Nəzirovanın ərəb mövzularında orkestrlə fortepiano üçün konserti, Qara Qarayevin “İldırımlı yollarla” baletindən süita və fortepiano ilə orkestr üçün konserti səslənib. Musiqiçilərin ifasından vəcdə gələn tamaşaçılar onları uzun müddət səhnədən getməyə qoymayıblar.

Xəyalə Muradlı