“Sənin adın Dənizdir” – FOTO

Bəstəkarlar İttifaqının mətbuat xidmətinin rəhbəri İltifat Hacıxanoğlunun Lent.az-a verdiyi məlumata görə, musiqisi ilə yanaşı librettosu da F.Əlizadəyə məxsus olan “Sənin adın Dənizdir” xarici ölkənin opera və balet teatrının sifarişi ilə yazılan ilk Azərbaycan operasıdır. Operada amerikalı gənc rəssam Denislə okeanın o tayından anası ilə qastrola gəlmiş azərbaycanlı gənc xanəndə Seymurun məhəbbətindən və bu sevginin etnik, dini fərqlərin yaratdığı problemlərin öhdəsindən gələ bilmək qüdrətindən bəhs olunur.

Dəniz və Seymurun məhəbbəti iki musiqi cərəyanı vasitəsilə təqdim edilir. Dənizin partiyasını hyustonlu soprano Lora Botkin, atasını amerikalı bariton Con Pakkard, Seymurun partiyasını istedadlı gənc xanəndə Babək Niftəliyev, anasını isə xalq artisti Mələkxanım Əyyubova ifa edib. Onları müşayiət edən orkestrin tərkibində Azərbaycan ifaçıları xalq artistləri tarzən Möhlət Müslümov, kamança ustası Fəxrəddin Dadaşov da olub. Bəstəkar Firəngiz Əlizadənin müasir dövrün musiqisini muğamımızla məharətlə sintez etməsi tamaşaçılar tərəfindən rəğbətlə qarşılanıb və ayaq üstə alqışlanıb.

Elə Amerika mətbuatı da Firəngiz Əlizadənin üslubundan bəhs edərək, onun Şərqin modal sistemi ilə Qərbin bəstəkar texnikasının cəsarətlə sintez etdiyini vurğulayıb: “Bu, bəstəkarın Şərqlə Qərbin mədəniyyətlərarası dialoquna növbəti böyük uğuru və qiymətli hədiyyəsidir”.

Premyeradan dərhal sonra yerli “Houston Chronikle” qəzetində opera barədə Firəngiz xanıma xitabən “Sizin adınız Qərblə Şərqin simvoludur” sərlövhəli geniş məqalə dərc olunub.

Qeyd edək ki, dünyaca məşhur “Houston Grand Opera”nın səhnəsində “Your Name Means the Sea” operasının premyerasının növbəti premyerası mayın 26-da nəzərdə tutulub.

Xəyalə