Naxçıvan Teatrı Əkrəm Əylislinin “Yazığam, sevmə məni” pyesini səhnələşdirir

Cəlil Məmmədquluzadə adına Naxçıvan Dövlət Musiqili Dram Teatrı yeni tamaşa səhnələşdirir. Teatrın direktoru, Xalq arttisti Kamran Quliyevin Lent.az-a verdiyi məlumata görə, kollektiv Əkrəm Əylislinin “Yazığam, sevmə məni” pyesinin məşqlərinə başlayıb.

Tamaşanın quruluşçu rejissoru Xalq artisti Rövşən Hüseynov, rəssamı Naxçıvan Muxtar Respublikasının əməkdar rəssamı Səyyad Bayramovdur. Əsas rolları Azərbaycan Respublikasının əməkdar artisti Elmira Kərimova, Naxçıvan MR-in əməkdar artistləri Bəhruz Haqverdiyev və Günay Qurbanova edirlər.

Tamaşa Böyük Vətən Müharibəsi illərində arxa cəbhədə baş verən hadisələrdən bəhs edir.

Qeyd edək ki, C. Məmmədquluzadə adına Naxçıvan Dövlət Musiqili Dram Teatrı bu il Anarın “Qaravəlli”, xalq yazıçısı Elçin Əfəndiyevin “Ah Paris…Paris…” əsərlərini tamaşaya qoyub. İlin sonunadək Şamil Sadiqin “Qana qan qarışdı” əsərlərinin də səhnələşdirilməsi planlaşdırılır.

Fariz YUNİSLİ