Lətif Kərimov anıldı

Lent.az-ın məlumatına görə, tədbirdə görkəmli xalçaçı alim, xalq rəssamı Lətif Kərimovun 15 eskizi sərgilənib. Bundan başqa 2007-ci ildə Parisdə YUNESKO-nun iqamətgahında alimin 100 illik yubileyi münasibətilə keçirilən “Azərbaycan xalçası” və “Azərbaycan xalça sənəti” mövzusunda beynəlxalq simpozium üçün hazırlanıb çap edilmiş 2 cildlik “Lətif Kərimov fenomeni” kitabı da nümayiş olunub.

Tədbirdə muzeyin şöbə müdiri Aygün Abbasova çıxış dünyada ilk xalça muzeyinin Azərbaycanda açılmasında Lətif Kərimovun təşəbbüsü və böyük zəhməti olduğunu vurğulayıb. O bildirib ki, məhz Lətif Kərimov ilk dəfə Azərbaycan xalçalarını tam olaraq tədqiq edib, onları növlərə, qruplara, məktəblərə ayırıb.

Sənətşünas Kübra Əliyeva isə xalçaçı rəssamın həyat və yaradıcılığı barədə geniş məlumat verib.

Daha sonra Lətif Kərimova həsr olunmuş “Ömrün naxışları” filmi təqdim olunub. İlk dəfə nümayiş etdirilən və alimin şəxsi arxivindən götürülən bu film 1990-cı ildə bir jurnalist tərəfindən lentə alınıb.

Xəyalə Muradlı