600 il yaşı olan “Quran” kitabı nümayiş olunacaq

İdarədən Lent.az-a verilən məlumata görə, sərgidə Qurani-Kərim və təfsir kitabları nümayiş etdiriləcək.

Ekspozisiyada sərgilənən 600 il yaşı olan Quranın vərəqləri tərkibində gümüş olan məhlula salındığından günümüzə qədər təhrif olunmadan gəlib çatıb. Ölçüsü 1 sm olan, dairəvi formada diametri 4 sm olan, səkkiz guşəli Quran kitabları ilə yanaşı üzərində Quran ayəsi yazılmış düyü, lobya da sərgilənəcək. Şeyx Hüseynə məxsus, Naxçıvanda Kəngərlilər sülaləsinə aid olan və Dağlıq Qarabağın işğalı zamanı insanların özləri ilə gətirdikləri Qurani-Kərimlər də sərgidə yer alır. 1908-ci ildə Məhəmməd Həsən Mollazadə tərəfindən Azərbaycan dilinə tərcümə edilən və Hacı Zeynalabdin Tağıyevin vəsaiti hesabına çap olunmuş Qurani-Kərimi də görmək mümkün olacaq. Təbii fəlakətlərdən, yanğından zərər çəkmədən çıxmış müqəddəs kitablar, düşmənlərdən gizlətmək məqsədi ilə uzun müddət divara hörülmüş Qurani-Kərim də ekspozisiyada var.

10 gün davam edəcək sərgiyə giriş pulsuzdur.