Həmidə Ömərova: “Daxilən çox qocalmışam”

Aprelin 25-i xalq artisti, tanınmış kino aktrisa Həmidə Ömərovanın doğum günüdür.

Aktrisanın Lent.az-a bildirdiyinə görə, bu dəfə də ad gününü evdə, yaxınlarının arasında qeyd edəcək. Sənət yoldaşlarından isə cəmi 4-5 nəfər doğum gününü onunla birlikdə keçirəcək. Ancaq Həmidə Ömərova hər il olduğu kimi bu il də sevinmir: “Mən ad günlərimdə heç vaxt sevinmirəm. Çünki bir yaş da qocalıram. Düzdür, gərək ürək qocalmasın. Amma mənə elə gəlir ki, mən daxilən, mənəvi cəhətdən daha çox qocalmışam”.

Qeyd edək ki, Həmidə Ömərova Bakıda anadan olub. 1975-79-cu illərdə Ümumittifaq Dövlət Kinematoqrafiya İnstitutunun aktyorluq şöbəsində təhsil alıb.

1979-1993-ci illərdə C. Cabbarlı adına “Azərbaycanfilm” kinostudiyasında, 1992-93-cü illərdə Azərbaycan Kinematoqrafçılar İttifaqında çalışıb. Filmlərə çəkilməklə yanaşı, 500-dən artıq bədii filmin dublyajı və səsləndirilməsində fəal iştirak edib. “Azərbaycan kinosunda feminizm”, “ABŞ kinosu: 1895-1945-ci illər”, “Amerika kino tarixi” kitablarını qələmə alıb. Hal-hazırda Azərbaycan Dövlət Mədəniyyət və İncəsənət Universitetinin kinoşünaslıq kafedrasına rəhbərlik edir.