Aysel Teymurzadə yenə təəccübləndirdi

Azərbaycanın əməkdar incəsənət xadimi, Muğam Teatrının direktoru Arif Qazıyev Novruz bayramı axşamı televiziya tamaşaçılarına maraqlı bir sürpriz hazırlayıb. Bu barədə tanınmış rejissor özü Lent.az -a məlumat verib.

Arif müəllim bildirib ki, quruluş verdiyi bayram konserti digər konsert proqramlarından fərqlənəcək: “Maraqlı Novruz personajlarının iştirakı ilə bayram konserti hazırlamışıq. Hər dəfə böyük maraqla izlədiyimiz iki Azərbaycan kinosu - “O, olmasın, bu olsun” dan “Məşədi İbad”, “Bəxtiyar” k/f-dən “Hüseynova bacıları”nın obrazlarını yeni interpretasiyada tamaşaçılara təqdim edəcəyik. Həmçinin Kosa və Keçəlin bayramda başlarına gələn ən maraqlı məqamları da olduğu kimi tamaşaçılara təqdim etməyə çalışacağıq. Bayram konsertinin “Bahar qızı” isə Azərbaycanının gözəl qızı, “Eurovision-2009” mahnı müsabiqəsində Araşla birlikdə üçüncü yeri qazanmış Aysel Teymurzadə olacaq”.

Rejissor qeyd edib ki, Aysellə bərabər digər estrada müğənniləri də konsert proqramında öz mahnılarını səsləndirəcəklər.

Lalə Yusifqızı