“Ala gözlüm” 30 il bundan öncə -

“Sevilən mahnıların olmamasında dinləyicilər günahkardır. Dinləyicilərlə sənətçilər arasında anlaşma olmalıdır. Dinləyicilərin zövqsüz olmasına səbəb sənətçilərdir. Nə qədər ki maddiyyat mənəviyyatdan üstün tutulur, bu belə davam edəcək”. Bunu Lent.az-a açıqlamasında xalq artisti Akif İslamzadə ifa etdiyi məşhur “Neyləyim”, hamının yaddaşında isə “Alagözlüm” kimi qalan mahnısından danışarkən deyib.

Xalq artisti sözləri Nigar Rəfibəyliyə, musiqisi Emin Sabitoğluna məxsus olan 30 yaşlı mahnının ilk ifaçısı kimi yubiley tədbiri keçirib. Emin Musəvinin aparıcılığı ilə keçirilən tədbirə xalq artistləri Amalya Pənahova, Nazpəri Dostəliyeva, əməkdar artistlər Tünzalə Ağayeva, İlqar Muradov, Sevda Ələkbərzadə, müğənnilər Emma Ələkbərzadə, Faytonçu Nazim, Zamiq, Rüstəm(“Şeron”), Akif İslamzadənin yaxınları, dostları qatılıb.
Mahnının xalq artistinin həyatında və Azərbaycan musiqisində dərin iz buraxdığını deyən Emin Musəvi bildirib ki, “Alagözlüm” sözün əsl mənasında sənət əsəridir. Daha sonra sözügedən ifa yenidən dinlənilib.

Xalq artisti Amalya Pənahova çıxış edərək,mahnının tarixçəsindən danışıb:”1982-ci ildə Rəsul Rza dünyasını dəyişmişdi. Nigar xanımın da bundan xəbəri yox idi. Xəstəxanada yatırdı, ağır idi. Onun könlünü almaq üçün oğlu Anar Emin Sabitoğlundan xahiş edərək, bildirib ki, anasının yazdığı bu şeirə mahnı bəstələsin. Emin Sabitoğlu da bu mahnını bəstələyib. Mahnı studiada deyil, ev şəraitində yazılıb. İlk dəfə məhz Akif İslamzadə oxuyub və çox uğurlu alınıb”.

Daha sonra çıxış edən Tünzalə Ağayeva, İlqar Muradov və başqa qonaqlar mahnı haqqında öz fikirlərini söyləyiblər, mahnılar səsləndiriblər.

Jalə