Sahib İbrahimov məşhur italyan modelyerlə tərəfdaş olub

Məşhur italyan modelyer Roberto Kavalli Rusiya və Ukraynada öz adını daşıyan gecə klublarının şəbəkəsini yaratmaq üçün tərəfdaş tapıb.

Lent.az-ın “RBK daily” nəşrinə istinadən verdiyi məlumata görə, “Cavalli Glubs” şəbəkəsinin inkişafına Azərbaycanın ATV telekanalının qurucusu və şəriki Sahib İbrahimov investisiya qoyacaq.

Qeyd edək ki, Rusiya və Ukraynada “Cavalli Glubs” klublar şəbəkəsinin açılması ilə bağlı məsləhətçi şirkət qismində “Penny Lane Realty” şirkəti çıxış edir. Roberto Kavalli və Sahib İbrahimovun planları barədə də qəzetə bu şirkətin daşınmaz əmlakın ticarəti departamentinin rəhbəri Aleksey Moqila məlumat verib. O deyib ki, tərəfdaşların bu ideyası 1 il əvvəl ortaya çıxıb.

Mediamaqnat ilkin mərhələdə Moskva, Sankt-Peterburq və Kiyevdə klub-restoran biznesi bazarına 6 milyon avro investisiya qoymağa hazırdır. Roberto Kavalli və Sahib İbrahimov payızda gecə klubu açmaq üçün məqsədlə Azərbaycan əsilli iş adamı Telman İsmayılova məxsus olan və sovet dönəmində Moskvanın simvollarından sayılan “Praqa “restoranını da icarəyə götürürlər.

“RBK daily” yazır ki, Rusiya və MDB ölkələrində belə şəbəkənin yaradılmasının İdeya müəllifi kimi Roberto Kavalli çıxış etsə də, layihəni ATV telekanalının qurucusmu və şəriki Sahib İbrahimov maliyyələşdirəcək: “Sahib İbrahmov hələ Rusiya daşınmaz əmlak bazarının iştirakçısı deyil. Onun əsas biznesi Azərbaycan, Dubay və Londondadır. Roberto Kavalli və Sahib İbrahimov 2011-ci ildə Moskva, Sankt-Peterburq və Kiyevdə əyləncə mərkəzləri açmağı planlaşdırırlar. Bu məqsədlə Rusiya paytaxtında fevral-mart aylarında ərazi ayrılacağına ümid bəslənilir. Moskvada , Sankt-Peterburqda 2 obyektin açılması nəzərdə tutulur. Bir klubun açılması üçün 2 milyon avro vəsait lazımdır. Tərəfdaşlar ilk klubu bu ilin payızında açmağı planlaşdırırlar”.

Aleksey Moqila bildirib ki, tərəfdaşlar “Praqa” restoranının ikinci və dördüncü mərtəbəsini icarəyə götürüblər. İcarə müddəti 3 ildən az deyil. Telman İsmayılovla bu barədə danışıqlar 2010-cu ilin sentyabrından aparılır.
Xatırladaq ki, “Cavalli Glubs” şəbəkəsi 2008-ci ildəny aradılmağa başlanılıb. İlk klub Florensiyada, daha sonra Milan və Dubayda yaradılıb. Klubların fəaliyyəti uğurlu olub. Buna görə də Ukrayna və Rusiyada da belə klubların yaradılmasına qərar verilib