Maestro Ceyhun etiraza qalxdı: “Aləminki aləmlədi, kor qızınkı nənəmlədi”

Maestro Ceyhunun “Muğam Aləmi” Beynəlxalq Festivalında iştirak etmək arzusu reallaşmayıb. Musiqiçi Lent.az-a açıqlamasında bu barədə şikayətini çatdırıb:
“Muğam festivalında mən də iştirak etmək istəyirdim. İfaçıların göstərdiyi çıxışlara çox sevindim. Amma atalarda bir məsəl var - “aləminki aləmlədi, kor qızınkı nənəmlədi”. Mən bütün şərq ölkələrindən gələn ifaları izlədim. Hamısının musiqi alətləri arasında skripka var idi. Özbəkistan ifaçısı skripkanı dizində ifa edirdi. Ərəblərin, hindlərin öz milli muğamlarında skripka var”.

Ceyhun muğam parçalarının tar, kamançadan başqa skripkada da ifa edilməsini arzu edir: “Bizdə isə olan istedad, duyum dünyanın heç yerində yoxdur. Nəyə görə bizim muğama tar-kamançadan əlavə skripka da daxil edilməsin? Mən muğam ifa edəndə mənə irad tuturlar ki, bu kamança musiqisidir, niyə onu skripkada ifa edirsən? İndi bəzi musiqi mütəxəssisləri, tənqidçiləri nəticə çıxarsınlar ki, biz buna skripka da əlavə edə bilərik. Yanına qəşəng kanon, bağlama tar əlavə edə bilmərik? Elə onun-bunun ifasında qulaq asıb bəh-bəh deməliyik? Bu barədə çox heyfsiləndim”.

Lalə Yusifqızı