Qanunsuz totalizator fəaliyyəti göstərən obyektlər aşkarlandı

Vergilər Nazirliyinin dəfələrlə xəbərdarlıq etməsinə baxmayaraq, Bakı şəhərinin müxtəlif yerlərində qanunsuz totalizator fəaliyyəti ilə məşğul olan bir sıra ictimai-iaşə obyektlərində futbol və digər idman oyunları ərəfəsində vətəndaşlar tərəfindən proqnoz verilərək pul qoyuluşlarının həyata keçirilməsi hallarına hələ də rast gəlinir.

Lent.az-ın Vergilər Nazirliyinin rəsmi saytına istinadən verdiyi məlumata görə, Vergilər Nazirliyinin müvafiq qurumları tərəfindən paytaxtın müxtəlif yerlərində vergi nəzarəti tədbirləri həyata keçirilərkən Nərimanov rayonu, F.X.Xoyski prospekti 87 ünvanda yerləşən, vətəndaş Əsgərov Azər Allahyar oğluna məxsus “NTV+”, Xətai rayonu, M.Hadi küçəsi, ev 25 ünvanda yerləşən, Hüseynzadə Aslan İlyas oğluna məxsus “Az-bet”, Suraxanı rayonu, Əmircan qəsəbəsi, M.Mustafayev küçəsi, ev 7 ünvanda yerləşən Əsgərov Rəşid Fərhad oğluna məxsus “Qalatasaray”, Yasamal rayonu, F.Ağayev küçəsi ilə Z.Xəlilov küçəsinin kəsişməsi ünvanında yerləşən Kərimov Tural Rövşən oğluna məxsus “Aspirant”, Nəsimi rayonu, Cavadxan küçəsi 17 ünvanda yerləşən Əliyev Ramin Musa oğluna məxsus “Qalatasaray” və Xəlilova Mahizər Ağaxan qızına məxsus “Çay evi” obyektlərində qanunsuz fəaliyyətlərini təsdiq edən 1 ədəd noutbook, 8 ədəd kompüter prosessoru, 3 ədəd möhür, 1.101,0 manat nağd pul vəsaiti, "qara mühasibatlıq" sənədləri, müxtəlif firmalara məxsus yüzlərlə sayda vətəndaşlara verilmiş uduş pullarını təsdiq edən ödəniş qəbzləri və kuponlar aşkar olunaraq götürülüb.

Vergilər Nazirliyi bir daha xəbərdarlıq edir ki, xüsusi razılıq tələb olunan fəaliyyət növləri ilə belə razılıq (lisenziya) almadan məşğul olan, o cümlədən qanunsuz totalizator fəaliyyəti göstərən bütün fiziki və hüquqi şəxslər barədə qanun çərçivəsində tədbirlər görüləcək.