Dəniz Administrasiyasının rəhbərliyi İsgəndəriyyəyə gedir

Misirdə Ümumərəb Dəniz Gəmiçiliyi Palataları Federasiyası İdarə Heyətinin toplantısı keçiriləcək
Mayın 18-20-də Misir Ərəb Respublikasının İsgəndəriyyə şəhərində Ümumərəb Dəniz Gəmiçiliyi Palataları Federasiyası İdarə Heyətinin 13-cü toplantısı keçiriləcək. Azərbaycan Dövlət Dəniz Administrasiyasının (ADDA) mətbuat xidmətindən Lent.az-a daxil olan məlumata görə, tədbirdə ölkəmiz də təmsil olunacaq. Belə ki, Ümumərəb Dəniz Gəmiçiliyi Palataları Federasiyası İdarə Heyətinin 13-cü toplantısında Azərbaycanı Dövlət Dəniz Administrasiyasının rəis müavini Namiq Ağamalıyevin rəhbərlik etdiyi nümayəndə heyəti təmsil edəcək. Dünyanın bir sıra ölkələrinin Dəniz Administrasiyaları rəhbərlərinin dəvət edildiyi bu tədbirdə iştirakçılar Ümumərəb Dəniz Gəmiçiliyi Palataları Federasiyasının fəaliyyəti, dəniz administrasiyaları və gəmiçiliklərinin işləri ilə tanış olacaq, dəniz nəqliyyatının inkişaf etdirilməsinə dair bir sıra məruzə və çıxışlar edəcək və dinləyəcək, təcrübə mübadiləsi aparacaqlar.
Pərvin ABBASOV