Azərbaycan Dövlət Neft Fondu 10 ton qızıl alıb

Lent.az-ın İTV-yə istinadən məlumatına görə, hazırda həmin qızıllar London banklarında saxlanılır və ölkəyə gətirilməsi ilə bağlı hazırlıq işləri aparılır.

Fondun icraçı direktoru Şahmar Mövsümov bildirib ki, ölkəyə gətiriləcək qızılın gömrük rüsumlarından azad olunması ilə bağlı Nazirlər Kabinetinə də müraciət edilib: " Dövlət Neft Fondunun idxal etdiyi fiziki qızılın gömrük yığımlarından azad edilməsi haqqında təkliflə müraciət etmişik. Bu məsələ həll olunandan sonra qızılın ölkəyə gətirilməsinə başlanacaq. Qızıl Mərkəzi Bankın xüsusi anbarlarında saxlanacaq."

Ş.Mövsümov onu da bildirib ki, Fondun gələn il üçün büdcə layihəsinin hazırlanması prosesi də başa çatmaqdadır. Bundan başqa fond tərəfindən iri neft-qaz layihələrinin maliyyələşdirilməsi də nəzərdə tutulub.

İndiyədək fond xarici şirkətlərin səhmlərinin alınmasına 200 milyon dollar vəsait yatırıb. İlin sonunadək isə bu məbləğ 600 milyon dollara çatdırılacaq. Yaxın günlərdə fond bir neçə ölkədə daşınmaz əmlak da alacaq.