Albaniyanın paytaxtı Tiranada kişilər və qadın ağırlıqqaldıranlar arasında Avropa çempionatına start verilib. Lent.az-ın məlumatına görə, yarışın ilk günündə Azərbaycan təmsilçilərindən Silviya Angelova körpücük üzərinə çıxıb.
O, 48 kq çəki dərəcəsində mübarizə aparıb. Bir il əvvəl Türkiyənin Antalya şəhərində keçirilmiş Avropa çempionatında bürünc medal qazanan qadın idmançımız nəticəsini daha da yaxşılaşdırıb. Angelova iki hərəkətin cəmində 179 kq (80 kq + 99 kq) nəticə ilə Avropa ikincisi olub. Birdən qaldırmada əvvəlcə 75 kq, sonra isə 80 kq-lıq ştanqları başı üzərinə qaldırmağı bacaran təmsilçimiz 82 kq-ı ram edə bilməyib və gümüş medaldan cəmi 1 kq, qızıldan 2 kq ayrı düşüb. İdmançımız 3-cü olaraq kiçik bürünc medal qazanıb. Angelova təkanla qaldırma hərəkətinə də uğurla başlayıb. 95 kq çəkini sifariş verən idmançımız onun öhdəsindən gəlməklə həm bu hərəkətdə, həm də ümumi sıralamada bürünc medalı təmin edib. Daha sonra sifariş verdiyi 99 kq-ı da uğurla qaldıran atletimiz təkanla qaldırmada qızıl, toplamda isə minimum gümüş medalı təmin edib. Son cəhdində isə 101 kq-ı da qaldırsaydı, o, Avropa çempionu adını qazana bilərdi. Lakin bu baş verməyib və Angelova gümüş medalla kifayətlənib.
Beləliklə, milli komandamız Avropa çempionatına birdən-birə üç – iki kiçik (1 gümüş, 1 bürünc), bir böyük medalla (qızıl) başlayıb.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
