"Güclü komanda yaradacağıq" - Qurban Qurbanov "Millətlər Liqası"ndan danışdı

“Millətlər Liqasındakı rəqiblərimizi bildik. Artıq bundan sonrasını düşünməliyik”. Apasport.az saytı xəbər verir ki, bu sözləri Azərbaycan yığmasının baş məşqçisi Qurban Qurbanov deyib.

Millətlər Liqasının D liqasında yer alan millimizin rəqibləri bəlli olub. Yığmamız III qrupda Kosovo, Malta və Farer adaları ilə mübarizə aparacaq.

Qurbanov “CBC-Sport”a açıqlamasında püşkü dəyərləndirib. O, rəqiblərə ciddi yanaşacaqlarını qeyd edib: “Qrupdakı rəqibləri daha yaxından tanımalı və oyunlara düzgün hazırlaşmalıyıq. Komandamızı daha yaxşı hala gətirmək, daha yaxşı formalaşdırmaq üçün vaxtımız var. Düşünürəm ki, turnirə qədər daha mehriban və güclü komanda yaradacağıq. Bu gün dünya futbolunda istənilən nəticə qeydə alınır. Ən zəif komanda belə, bəzən güclü rəqibinə qalib gəlir. Millətlər Liqası ilk dəfə keçiriləcək. Buna görə də, hamının gözü bu yarışda olacaq. Bütün komandalar şansdan maksimum istifadə etməyə çalışacaqlar. Bu rəqiblərlə başqa turnirdə qarşılaşsaydıq, onlarla oynamaq bizə, bəlkə də, daha asan olardı. Hər biri bu turnirə ciddi hazırlaşacaq. Bizim kimi, onlar da şanslarından maksimum faydalanmağı düşünürlər. Həm biz, həm də azarkeşlər danışığımızda, davranışımızda rəqiblərə hörmətlə yanaşmalı, onları düzgün qiymətləndirib, uğurlu nəticə əldə etməyə çalışmalıyıq”.