Rövnəq Abdullayev: “Klublarımızın qarşısına qruplara düşmək vəzifəsi qoyulacaq”

“2012-ci il “İdman ili”ndə futbolumuzda da böyük inkişaf oldu, əlamətdar il oldu. Premyer Liqa çox maraqlı oldu, gözəl nəticələr qeydə alındı. Yeni stadionlar istifadəyə verdik ki, bunların da yeni mövsümün oyunlarının keçirilməsində böyük rolu olacaq”.

Lent.az-ın məlumatına görə, bunu Premyer Liqa qaliblərinin mükafatlandırma mərasimində AFFA prezidenti Rövnəq Abdullayev deyib. O, futbolumuzda əldə olunan əlamətdar hadisəyə də toxunub. Abdullayev bildirib ki, bu, “Neftçi”nin Avropa Liqasının qrup mərhələsinə vəsiqə qazanması və artıq 1 xal qazanmasıdır: “İnanıram ki, bu çempionatda daha gözəl nəticələr əldə edəcəyik və klublarımız Avropa kuboklarında bizi sevindirəcək. “Neftçi”nin Avroliqaya vəsiqə qazanması böyük uğurdur. Klublarımızın gələcəkdə qarşılarına qoyulan vəzifə qruplara düşməkdən ibarət olacaq. Bu, minimal vəzifə olmalıdır. İnanıram ki, növbəti mövsüm daha uğurlu olacaq”.

Elşən MƏMMƏDOV