Oğlunu basdırmağa getdi, ərinin məzarının yanında öldü

72 yaşlı təqaüdçü dekabrın 3-də Solneçnoqorsk rayonundakı Perepeçinski qəbiristanlığında oğlunun külünü basdırmağa hazırlaşarkən ərinin məzarının yanında ölüb.

Lent.az xarici KİV-ə istinadən xəbər verir ki, qadının 45 yaşlı oğlu bu il noyabrın 13-də dünyasını dəyişib, yaxınları onu yandırıblar.

Qadın 51 yaşlı ikinci oğlu ilə birlikdə ölən övladının külünün basdırılması ilə bağlı danışıqlar aparmaq üçün qəbiristanlığa gəlib. Ziyarətçilər və dəfn xidmətinin əməkdaşı məzara yaxınlaşanda qadın qəflətən özünü pis hiss edib.

"Hər şey yaxşı idi, o, əsəbi deyildi, sonra birdən yıxılmağa başladı. Mən ondan iki metr aralı idim və qollarından tutdum. Sonra təcili yardım çağırmaq üçün qaçdım. Üç dəqiqədən sonra qayıdanda o, artıq ölmüşdü”, – qəbiristanlıq işçisi izah edib.

Kilsə həyətinə gələn həkimlər yalnız yaşlı qadının ürək-damar çatışmazlığından öldüyünü təsdiqləyiblər. Təqaüdçü ixtisasca həkim olub və uzun illər uşaq klinikasında işləyib.